لاہور: پنجاب میں سی این جی اسٹیشنز مزید 3 دن بند رکھنے کا فیصلہ کرلیا گیا، گیس اسٹیشن 11 جنوری سے بند پڑے ہیں۔
اطلاعات کے مطابق صوبہ پنجاب میں مزید 3 دن تک سی این جی گیس اسٹیشنز کو بند رکھنے کا حکم جاری کردیا گیا جس کے بعد سی این جی اسٹیشنز کو مزید 3روز تک گیس فراہم نہیں کی جائے گی۔
سوئی گیس حکام کے مطابق 17جنوری کی شام6 بجےسی این جی اسٹیشنز کو گیس دی جائے گی۔
واضح رہے کہ سوئی ناردرن گیس حکام نے 11 تا 14 جنوری گیس کی فراہمی بند رکھنے کا اعلان کیا تھا جس میں مزید تین دن کی توسیع کردی گئی ہے۔اب 11 جنوری سے بند کی گئی سی این جی گیس کی فراہمی 17 جنوری کو شام چھ بجے بحال ہوگی۔
سی این جی کی قیمت میں پہلے ہی اضافہ کیا جاچکا ہے اور اب مہنگی ہونے کے ساتھ ساتھ اس کا حصول بھی مشکل ہوگیا ہے۔ حکومتی چھوٹ ملتے ہی 4 جنوری کو سی این جی اسٹیشن مالکان نے سندھ کے بعد پنجاب میں بھی سی ا ین جی کی قیمت میں دو روپے فی کلو کا اضافہ کردیا۔ قیمت میں اضافے کے بعد پنجاب میں سی این جی کی نئی قیمت 53روپے 50 پیسے ہوگئی ہے۔
خیال رہے کہ حکومت کی جانب سے قیمتیں مقررکرنے کا اختیار سی این جی مالکان کو دینے کے بعد یہ پہلا اضافہ ہے۔
