لاہور: پاکستان تحریکِ انصاف نے مسلح افواج کے خلاف شر انگیز پروپیگنڈا کرنے پر متحدہ کے قائد الطاف حسین کے خلاف پنجاب اسمبلی میں مذمتی قرار داد جمع کروا دی، قرار داد میں الطاف حسین کو برطانیہ سے گرفتار کرکے پاکستان لانے کا مطالبہ بھی کردیا گیا۔
پاکستان تحریکِ انصاف کے ذرائع کے مطابق متحدہ کے قائد الطاف حسین کے خلاف مذمتی قرارداد صوبائی اسمبلی میں تحریک انصاف کے پارلیمانی لیڈر محمود الرشید نے جمع کروائی۔
قرار داد میں مسلح افواج کے خلاف الطاف حسین کی جانب سے کی جانے والی ہرزہ سرائی کی شدید مذمت کرتے ہوئے کہا گیا کہ الطاف حسین کو پاکستان لا کر غداری کا مقدمہ چلایا جانا چاہیے۔
ان کا کہنا تھا کہ مسلح افواج نے وطن عزیز کے دفاع کے لیے عظیم قربانیاں دی ہیں جبکہ الطاف حسین اپنی تقاریر کے ذریعے پاکستان کی تاریخ مسخ کرنے کی کوشش کررہے ہیں۔
