ممبئی : بھارتی فلموں کے سپر اسٹار امیتابھ بچن فیس بک پران کی مداحوں سے ملاقات پر تنقید کرنے والے ایک شخص پر برس پڑے۔
ان کا کہناتھا کہ میرے پرستار مجھے بہت عزیز ہیں اور میں ان سے اپنے گھر پر ہی مل سکتا ہوں کسی ساحلی مقام پر نہیں۔
یہ بات انہوں نے اپنے آن لائن بلاگ میں کہی، واضح رہے کہ امیتابھ بچن ہر اتوار کے روز اپنے گھر کے باہر اپنے پرستاروں سے ملاقات کرتے ہیں اور یہ سلسلہ گزشتہ کئی سال سے جاری ہے۔
اتوار کے دن ان کی رہائش گاہ کے باہر شاہراہ پر کافی رش کے باعث ٹریفک جام ہوجاتا ہے، جس سے گزرنے والوں کو بہت دشواری کا سامنا کرنا پڑتا ہے۔
اسی صورتحال سے دوچار ایک موٹر سائیکل سوار شخص نے زچ ہوکر فیس بک پر اپنے کومنٹ میں امیتابھ بچن کو تھرڈ ریٹ ایکٹر قرار دیا تھا۔
جس کے جواب میں امیتابھ بچن نے اپنے بلاگ میں اس شخص کو مخاطب کرتے ہوئے کہا کہ اے پریشان موٹر سائیکل سوار میں اپنے چاہنے والوں سے اپنے گھر پر ہی ملوں گا کسی ساحل پر نہیں۔
