اسلام آباد: انتخابی دھاندلی کےخلاف قائم جوڈیشل کمیشن آج پھر سماعت کرے گا، بنچ سیاسی جماعتوں کی جانب سے جمع کرائے گئے شواہد اور ثبوتوں کا جائزہ لے گا، کمیشن میں ثبوت اور درخواستیں جمع کرانے کی مہلت ختم ہوگئی ہے۔
جوڈیشل کمیشن میں سیاسی جماعتوں کی جانب سے ثبوت اور درخواستیں جمع کرانے کی ڈیڈلائن ختم ہوگئی، اے این پی کی بشریٰ گوہر اور پی ٹی آئی کے اسحاق خاکوانی نے جوڈیشل کمیشن میں دھاندلی کے ثبوت جمع کرادیے ہیں۔
جوڈیشل کمیشن نے تحریکِ انصاف کی درخواست پر ن لیگ کو نوٹس جاری کیا تھا، جس پر ن لیگ کے شاہد حامد نے جوڈیشل کمیشن میں اپنا جواب جمع کرایا۔
مسلم لیگ ن کا جواب بائیس صفات پر مشتمل ہے، جواب میں کہا گیا ہے کہ الیکشن آئین کے مطابق کرائے گئے، ن لیگ کے سینیٹر رفیق رجوانہ کا کہنا تھا کہ تحریک انصاف کے پاس کوئی ثبوت نہیں، واویلا کرنے کے بجائے پی ٹی آئی ثبوت لیکر آئے۔
ق لیگ نے بھی دھاندلی کے ثبوت جمع کرادیئے ہیں، جس میں پچیس گواہان طلب کرنے کیلئے فہرست بھی شامل ہے، اہم گواہان کی فہرست میں سابق الیکشن کمشنر فخرالدین جی ابراھیم ، رجسٹرار سپریم کورٹ ،رجسٹرار لاہور ہائیکورٹ شامل ہیں۔