اسلام آباد: شاہد خان آفریدی نے عمران خان سے ان کی رہائشگاہ پر ملاقات میں شادی کی مبارک باد دی۔
پاکستان کرکٹ ٹیم کے مایہ ناز آل راؤنڈر شاہد خان آفریدی نے اسلام آباد بنی گالہ میں تحریک انصاف کے کپتان عمران خان سے ملاقات کی۔
ملاقات میں شاہد خان آفریدی نے عمران خان کو شادی کی مبارکباد دیتے ہوئے اپنی خوشی کا اظہار بھی کیا اور کپتان کو دعا دیتے ہوئے کہا کہ امید ہے شادی ان کی زندگی میں بہتر تبدیلی لائے گی۔
اس موقع پرعمران خان نے شاہد آفریدی کی تواضع قہوہ اورمٹھائی سے کی۔
اس موقع پردونوں شخصیات نے آئندہ ماہ ہونے والے ورلڈ کپ 2015 کے حوالے سے تبادلۂ خیال کیا ، کپتان نے آفریدی کو قیمتی مشوروں سے بھی نوازا۔
پی ٹی آئی کے چیئرمین نے میگا ایونٹ کے لئے شاہد آفریدی اور پاکستانی ٹیم کے لئے اپنی نیک خواہشات کا اظہار بھی کیا۔
