اسلام آباد : وفاقی وزیر منصوبہ بندی احسن اقبال کا کہنا ہے کہ پاک چین اقتصادی راہداری پاکستان اور چین سمیت پورے خطے کیلئےگیم چینجر ثابت ہوگی۔
ان خیالات کا اظہار انہوں نے قومی اسمبلی میں پالیسی بیان دیتے ہوئے کیا، وفاقی وزیر احسن اقبال کا مزید کہنا تھا کہ دنیا بھر میں پاکستان کو چھیالیس ارب ڈالر کی سرمایہ کاری کا مرکز قرار دیا جارہا ہے۔
ان کا کہنا تھا کہ یہ ہے وہ تبدیلی جس کا انتظار تھا اور تبدیلی آگئی ہے،انہوں نے کہا کہ آئندہ چند سال میں ایشیاء کو عالمی معاشی ترقی کا مرکز بتایا جارہا ہے۔ اور پاکستان اپنے محل وقوع کے باعث تین ارب آبادی کو ملانے کی صلاحیت رکھتا ہے۔
وزیر منصوبہ بندی کا کہنا تھا کہ پاک چین اقتصادی راہداری کے روٹ اور حکومتی ترجیحات میں کوئی تبدیلی نہیں کی گئی ہے۔
