جگارتا: انڈونیشیا سے سنگاپور جانے والے ایئر ایشیا کے لاپتہ طیارہ کی تلاش کا کام ایک بار پھر شروع کر دیا گیا ہے۔
انڈونیشیا سے سنگاپور جانے والے ملائیشیا کے لاپتہ طیارے کی تلاش ایک بار پھر شروع کر دی گئی ہے، ملایشن حکام کے مطابق تلاش کا دائرہ مزید وسیع کردیا گیا ہے، سرچ آپریشن میں بحری جہاز، ہیلی کاپٹر اور ہوائی جہاز سے مدد لی جا رہی ہے۔
اتوار کو انڈونیشیا کی فضائیہ اور سنگاپور کے جہازوں نے بحیرۂ جاوا میں طیارے کی تلاش کا عمل اندھیرا ہو جانے اور خراب موسم کے باعث روک دیا تھا۔
اتوار کو انڈونیشیا کے شہر سورابایا سے سنگاپور جانے والا انڈونیشیا کے مسافر بردار طیارہ ایئر ایشیا کا رابطہ ایئر ٹریفک کنٹرول سے منقطع ہو گیا تھا۔ طیارے میں ایک سو باسٹھ افراد سوار ہیں۔
ایئر ایشیا کے چیف ایگزیکٹیو طیارے کے لاپتہ ہونے کے بعد سورابایا پہنچ گئے ہیں۔ ان کا کہنا ہے طیارے کا لاپتہ ہو جانا بہت بڑا صدمہ ہے۔ انڈونیشی حکام نے جہاز کاملبہ ملنے کی خبروں کی تردید کی ہے۔
