The news is by your side.

Advertisement

ایم کیو ایم کوفی الحال سندھ حکومت میں شامل نہیں کرسکتے،قائم علی شاہ

جیکب آباد /سکھر : جیکب آباد میں ایک سو پینتالیس ویں سات روزہ تاریخی ثقافتی میلے ،سندھ ہارس اینڈ کیٹل شو کا انعقاد کیا گیا جس کا وزیر اعلیٰ سندھ نے افتتاح کردیا ہے ۔

تفصیلات کے مطابق جیکب آباد کے نمائش گراؤنڈ میں لگائے گئے سندھ کے تاریخی میلے سندھ ہارس اینڈ کیٹل شو کا افتتاح کرنے کے بعد وزیر اعلیٰ سندھ قائم علی شاہ نے تقریب اور میڈیا سے گفتگو کرتے ہوئے کہا ہے کہ پارٹی کے فیصلے کے تحت ایم کیو ایم سے مذاکرات موخر کردیئے گئے ہیں۔

قائم علی شاہ کا کہنا تھا کہ پاکستان پیپلز پارٹی (پی پی پی) اس وقت تک متحدہ قومی موومنٹ کو حکومت میں شامل ہونے کی دعوت دینے سے متعلق فیصلہ نہیں کرے گی، جب تک ایم کیو ایم کے خلاف نئے الزامات کی تحقیقات مکمل نہیں ہوجاتیں۔

سید قائم علی شاہ کا کہنا تھا کہ پیپلز پارٹی نے اپنی سابقہ اتحادی جماعت ایم کیو ایم کے ساتھ سینیٹ الیکشن سے کچھ روز قبل بات چیت کا آغاز کیا تھا، تاہم موجودہ صورتحال کے پیش نظر متحدہ قومی موومنٹ کو سندھ حکومت میں شامل نہیں کیا جائے گا۔

قائم علی شاہ نے کہا کہ کراچی میں ٹارگٹ کلنگ کے واقعات میں 75 فیصد کمی واقع ہوئی ہے جو حکومتی کارکردگی کا منہ بولتا ثبوت ہے۔ سید قائم علی شاہ کا کہنا تھا کہ شکار پور بم دھماکے کے سرغنہ ملزم کی ہلاکت اور دیگر ملزمان کی گرفتار کے بعد سندھ میں امن و امان کی صورتحال بہتر ہوئی ہے۔

تقریب کے دوران اعلیٰ نسل کے مویشیوں گائے بیل ،گھوڑوں کی نمائش کرائی گئی اور مختلف اسکولوں کی طالبات نے ٹیبلوپیش کئے،تقریب کے اختتام پر رکن قومی اسمبلی اعجاز جکھرانی نے وزیراعلیٰ سندھ کو سندھ کی ثقافت کے مطابق تلوار کا تحفہ پیش کیا اور وزیراعلیٰ سندھ نے اعجاز جکھرانی ،صوبائی وزیر ممتاز جکھرانی اور ڈی سی جیکب آبادشاہ زمان کھوڑو میں شیلڈ تقسیم کیں۔

Print Friendly, PDF & Email

Comments

comments

یہ بھی پڑھیں