کراچی: الیکشن ٹریبونل نے حلقہ این اے دو سوپندرہ خیرپور میں غوث علی شاہ کو کامیاب قرار دے دیا۔الیکشن ٹربیونل نے این اے دو سو پندرہ کی عذرداری کا فیصلہ سنا دیا ہے۔
تفصیلات کے مطابق الیکشن ٹریبونل نے ن لیگ کے غوث علی شاہ کو کامیاب قرار دے دیا۔ غوث علی شاہ نے این اے دو سو پندرہ میں وسان علی کی کامیابی کو چیلنج کیا تھا جس کے بعد الیکشن ٹریبونل نے وسان علی کو کالعدم قرار دے دیا ۔
الیکشن ٹریبونل نے ایک لاکھ چوہترہزار دو سو چورانوے ووٹ نادرا کو تصدیق کے لیے بھیجے تھے ،نادرا نے رپورٹ میں ننانوے ہزار سات سو باون ووٹ ناقابل شناخت قرار دیئے تھے۔
علاوہ ازیں متحدہ قومی موومنٹ کے قائد الطاف حسین نے الیکشن ٹریبونل کی جانب سے حلقہ این اے 215 سے نواب وسان کی کامیابی کو کالعدم قراردینے اور سید غوث علی شاہ کو کامیاب قراردینے پر سید غوث علی شاہ اور ان کے اہل خانہ کو دلی مبارکباد پیش کی ہے ۔
ایک بیان میں الطاف حسین نے سید غوث علی شاہ کو مبارکباد دیتے ہوئے دعا کی کہ اللہ تعالیٰ آپ کو قوم اور اپنے حلقہ کے عوام کی زیادہ سے زیادہ خدمت کرنے کی توفیق عطا فرمائے(آمین)
