کراچی : ایم کیو ایم کے کنور نوید اور پی ٹی آئی کے عمران اسماعیل اپنا ووٹ نہیں ڈال سکیں گے۔
تفصیلات کے مطابق قومی اسمبلی کے حلقہ این اے 246 کے ضمنی انتخاب کیلئے نامزد متحدہ قومی مومنٹ اور پاکستان تحریک انصاف کےامیدواران کنور نوید جمیل اور عمران اسماعیل میں ایک بات مشترک ہے کہ مذکورہ دونوں حضرات 23 اپریل ضمنی الیکشن کے روز اپنا ووٹ کاسٹ نہیں کر سکتے۔
کیونکہ کنور نوید جمیل کا ووٹ این اے 219 حیدرآباد اور عمران اسماعیل کا ووٹ این اے 250 ڈیفینس میں رجسٹرڈ ہے۔
واضح رہے کہ 23 اپریل کو ہونے والے ضمنی انتخاب میں متحدہ قومی موومنٹ کے کنور نوید جمیل، پی ٹی آئی کے عمران اسماعیل ، اور جماعت اسلامی کے راشد نسیم سمیت دیگر گیارہ امیدوار مدمقابل ہوں گے۔
پریزائیڈنگ افسران کو انتخابی مٹیریل کی ترسیل کا آغاز ہوگیا ہے ، آج رات بارہ بجے انتخابی مہم ختم ہوتے ہی الیکشن کمیشن کے حکام پولیس اور رینجر ز ، تمام پولنگ اسٹیشنز پر کنٹرول سنبھال لیں گے ۔
انتخابی مٹیریل کی ترسیل کیلئے متعلقہ پریزائیڈنگ افسران کو انتہائی سخت نگرانی اور سیکیورٹی میں انتخابی مٹیریل فراہم کیا جارہا ہے ۔
جبکہ بیلٹ بکس اور بیلٹ پیپر 23 اپریل کی صبح رینجرز اور الیکشن کمیشن حکام کی نگرانی میں متعلقہ پولنگ اسٹیشنز کو فراہم کیے جائیں گے۔
