لندن: برطانیہ کی تاریخ کے اہم ترین دستاویز’میگنا کارٹا‘کو منظور ہوئے آٹھ سوسال مکمل ہونے پر2 پاؤنڈ کاسکہ جاری کیا ہےجس میں برطانوی تاریخ دان نےتاریخی غلطی کی نشاندہی کردی۔
ڈاکٹرمارک مورس قرون وسطیٰ کی تاریخ کے ماہرہیں اوران کا کہنا ہے کہ شاہی ٹکسال نے سکہ ڈھالنے میں’اسکول کے بچوں‘والی غلطی کی ہے۔ ان کا کہنا تھا کہ’میگنا کارٹا‘کی توثیق شہنشاہ جان نے 15جون 1215کو کی تھی اور اس مقصد کے لئے انہوں نے اپنی شاہی مہرکا استعمال کیا تھا لیکن سکے میں شہنشاہ جان کو دستاویزپرقلم سے دستخط کرتے دکھایا گیا ہے۔
میگنا کارٹا ایک تاریخ سازدستاویز ہے جس کے تحت ٹیکس دہندگان کی نمائندگی ہونی چاہیے، شفاف عدالتی تحقیقات ہونی چاہئیں اور کوئی بھی ’قانون سے بالاتر‘نہیں حتیٰ کے شاہی خاندان بھی نہیں جیسے عوامی حقوق حاصل کیے گئے تھے۔
میگنا کارٹا کے 800 سال مکمل ہونے پرشاہی ٹکسال نے’جان برگ ڈھال‘نامی آرٹسٹ کو سکہ بنانے کی ذمے داری سونپی تھی۔
ڈاکٹر مورس جو کہ شہنشاہ جان اوران کےدور پرکئی کتابوں کے مصنف ہیں ان کا کہنا ہے کہ یہ سکہ تاریخی لحاظ سے غلط ہے۔ شہنشاہ جان کے ہاتھ میں’پرکا قلم‘دکھانا بالکل اسکول کے بچوں جیسی غلطی ہے۔
انہوں نے مزید کہا کہ قرونِ وسطیٰ کے شہنشاہ دستاویزات کی توثیق کرنے کے لیے شاہی مہرثبت کرتے تھے یا اپنے کسی سرکاری افسر سے مہر ثبت کراتے تھے لیکن ان میں سے کوئی بھی دستخط نہیں کرتا تھا ایسی کوئی بھی دستاویز منظرِ عام پرنہیں ہے۔
سید فواد رضا اے آروائی نیوز کی آن لائن ڈیسک پر نیوز ایڈیٹر کے فرائض انجام دے رہے ہیں‘ انہوں نے جامعہ کراچی کے شعبہ تاریخ سے بی ایس کیا ہے اور ملک کی سیاسی اور سماجی صورتحال پرتنقیدی نظر رکھتے ہیں
