اسلام آباد: موبائل سمز کی بایئو میٹرک تصدیق کرانے کا وقت ختم ہوگیا، غیر تصدیق شدہ ڈھائی کروڑ سم بند کردی گئیں ہیں۔
گزشتہ رات بارہ بجے موبائل سمز کی بائیو میٹرک تصدیق کیلئے مہلت ختم ہوگئی، رات بارہ بجے سے غیر تصدیق شدہ سمز کی کال اور ایس ایم ایس سروس معطل کر دی گئی۔
پی ٹی اے کے مطابق بند کی گئی سمز کی حتمی فہرست کل تک جاری کی جائے گی۔
غیر تصدیق شدہ سمز رکھنے والے صارفین کو ٹیلی فون کال کرنے اورسننے کی سہولت میسر نہیں رہی جبکہ ایس ایم ایس سروس بھی بند کر دی گئی ہے، غیر تصدیق شدہ سم سے صرف موبائل کمپنی کی ہیلپ لائن پر کال کی جاسکتی ہے۔
ٹیلی کام ذرائع کے مطابق ایسے موبائل صارفین جنھوں نے گزشتہ رات بارہ بجے سے قبل اپنے زیر استعمال سموں کی بائیو میٹرک تصدیق نہیں کروائی وہ اب اپنی سم سے نہ تو کوئی فون کال کر سکتے ہیں اور نہ کوئی ایس ایم ایس بھیج سکتے ہیں۔
ٹیلی کام ذرائع کا کہنا ہے کہ بائیو میٹرک تصدیق کے بعد ہی صارفین کی فون کال اور ایس ایم ایس کرنے کی سہولت بحال کی جائے گی، ذرائع کا مطابق بند ہونے والی سمز ایک سال تک کسی دوسرے شخص کو جاری نہیں کی جائیں گی۔
ذرائع کا یہ بھی کہنا ہے کہ بند ہونے والی سمز کے اعدادو شمار کل تک پی ٹی اے کو دے دیئے جائیں گے، پی ٹی اے کے اعدادو شمار کے مطابق سات کروڑ اسی لاکھ سمز کی بائیو میٹرک تصدیق ہو سکی تھی جبکہ بائیو میٹرک تصدیق کی ڈیڈلائن ختم ہونے سے قبل تک ایک کروڑ ستر لاکھ سمز بند کی گئی تھیں۔
پاکستان ٹیلی کمیونیکشن اتھارٹی کے مطابق دس کروڑ تیس لاکھ سمز کی تصدیق کی جانا تھی، ذرائع کے مطابق تقریبا سات کروڑ اسی لاکھ سمز کی تصدیق کی گئی اور تقریبا ڈھائی کروڑ سمز کی تصدیق نہیں کرائی گئی۔
