The news is by your side.

Advertisement

بگٹی قتل کیس، پرویز مشرف کی درخواستِ استثنی منظور

کوئٹہ : نواب اکبربگٹی قتل کیس میں انسداد دہشت گردی کوئٹہ کی عدالت نے پرویز مشرف کی استثنیٰ کی درخواست منظور کرلی جبکہ عدالت نے نواب بگٹی کے مقدمہ قتل کی سماعت میں سابق صدر پرویز مشرف کے عدالت میں پیش نہ ہونے پر برہمی کا اظہار کرتے ہوئے آئندہ سماعت پر ضامن اور میڈیکل کے اوریجنل سرٹیفکیٹ سمیت پرویز مشرف کو پیش ہونے کا حکم دیدیا۔ کیس کی سماعت آٹھ ستمبر تک ملتوی کردی۔

نواب محمد اکبر بگٹی کے مقدمہ قتل کی سماعت انسداد دہشت گردی کی عدالت میں ہوئی، جج نذیر احمد لانگو نے مقدمہ کی سماعت کی۔ گزشتہ سماعت میں پرویز مشرف کو پیش کرنے کی یقین دہانی کرانے والے ضامن بھی عدالت میں پیش نہ ہوئے، جس پر عدالت نے برہمی کا اظہار کیا پرویز مشرف کے وکیل ذیشان جنجوعہ نے میڈیکل سرٹیفکٹ پیش کرتے ہوئے درخواست کی پرویز مشرف کو حاضری سے استثنیٰ دیا جائے۔

عدالت میں میڈیکل سرٹیفکیٹ کی فوٹو اسٹیٹ کاپی کے پیش کرنے پر عدالت نے سخت برہمی ظاہر کی، جمیل اکبر بگٹی کے وکیل سہیل احمد راجپوت ایڈووکیٹ نے عدالت کے سامنے اپنا نکتہ اعتراض رکھا اور اس کو عدالت میں پیش ہونے کی بجائے راہ فراہ اختیار کرنے کا تسلسل قرار دیا جبکہ تفتیشی ٹیم کی رپورٹ کے مطابق پرویز مشرف ہسپتال میں نہیں بلکہ اپنے گھر میں موجود ہیں۔

انسداد دہشت گردی کی عدالت میں سابق وفاقی وزیر داخلہ آفتاب شیر پاوٴ کے وکیل نے عدالت بتایا کہ ان کے موٴکل فلائٹ مس ہوجانے کے باعث پیش نہیں ہوسکے جبکہ سابق صوبائی وزیر داخلہ شعیب نوشیروانی عدالت میں پیش ہوئے، عدالت نے آج کی پیشی سے پرویز مشرف کو مستثیٰ قرار دیتے ہوئے آئندہ سماعت پر انہیں دونوں ضامنوں اور اصل میڈیکل سرٹیفکیٹ کے ساتھ ہر صورت پیش ہونے کا حکم دیتے ہوئے مقدمہ کی سماعت 8ستمبر تک کیلئے ملتوی کردی۔

Print Friendly, PDF & Email

Comments

comments

یہ بھی پڑھیں