The news is by your side.

Advertisement

زمبابوے کرکٹ ٹیم پاکستان پہنچ گئی

لاہور: چھ سال سے جاری انتظار آخرکار ختم ہوگیا، زمبابوے کی کرکٹ ٹیم پاکستان کے ویران گراؤنڈز کی رونقیں بحال کرانے لاہور پہنچ گئی۔

پاکستان کے ویران گراؤنڈز کی رونقیں اب بحال ہونگی، پاکستان میں چھ سال بعد پہلی غیرملکی کرکٹ ٹیم لاہور پہنچ گئی، زمبابوے کرکٹ ٹیم کی پاکستان آمد کے ساتھ ہی پاکستان میں بین الاقوامی کرکٹ کے دروازے بھی کھل گئے۔

 

زمبابوے کرکٹ ٹیم ایمریٹس کی فلائٹ ای کے چھ سو بائیس کے ذریعے لاہور پہنچی تو ائیر پورٹ پر صوبائی وزیرِ کھیل رانا مشہود، میاں مجتبیٰ شجاع الرحمان اور پی سی بی چیف آپریٹنگ آفیسر سبحان احمد سمیت اعلیٰ حکام نے زمبابوے کرکٹ ٹیم کا پرتپاک استقبال کیا اور مہمان ٹیم کو گلدستے پیش کئے۔

لاہورائیرپورٹ سے زمبابوے کی ٹیم کو لاہور کے مقامی ہوٹل منتقل کیا گیا ،فول پروف سیکیورٹی کےلئے ہوٹل کو چاروں اطراف سے سیل کر دیا گیا تھا، ہوٹل کے داخلی،خارجی راستوں اور ہوٹل کےاندر پولیس اورایلیٹ فورس کے کمانڈوز کے خصوصی دستے تعینات کیے گئے ہیں جبکہ کسی بھی ہنگامی صورتحال سے نمٹنے کےلئے رینجزر کی پلاٹون کو بھی تیار رہنے کی ہدایت کی گئی ہے۔      

زمبابوے کرکٹ ٹیم اپنے دورے کے دوران دو ٹی ٹوئنٹی اور تین ون ڈے میچز کھیلے گی، ایلٹن چگمبورا زمبابوے ٹیم کی قیادت کریں گے۔ ٹی ٹوئنٹی میچز بائیس اور چوبیس مئی جبکہ ون ڈے میچز چھبیس ،انتیس اور اکتیس مئی کو قذافی اسٹیڈیم میں ہی کھیلے جائیں گے۔

Comments

comments

یہ بھی پڑھیں