بالی ووڈ اداکارہ سارہ علی خان اور ہالی ووڈ کے معروف اداکار ہنری کیول کی ایک ساتھ تصاویر سامنے آنے کے بعد سوشل میڈیا پر مداح حیرت کا اظہار کر رہے ہیں۔
بالی ووڈ کی معروف اداکارہ سارہ علی خان کی سپرمین کا کردار ادا کرنے والے برطانوی اداکار ہینری کیول کے ساتھ تصاویر دیکھ کر مداح دنگ رہ گئے۔دونوں کی یہ غیر متوقع ملاقات انگلینڈ میں جاری پانچ روزہ گھڑ دوڑ کے مشہور تہوار رائل اسکوٹ کے دوران ہوئی۔
سارہ علی خان اور ہنری کیول دونوں ہی مشہور بین الاقوامی برانڈ ‘لانجینز’ کے ایمبیسیڈر ہیں اور اسی ایونٹ کے سلسلے میں دونوں نے ایک ساتھ فوٹو شوٹ کروایا۔
View this post on Instagram
سارہ علی خان نے کلاسک برطانوی انداز اپناتے ہوئے سفید لباس اور میچنگ ٹوپی زیب تن کر رکھی تھی، جبکہ ہنری کیول روایتی بلیک ٹیل کوٹ اور ٹاپ ہیٹ (برطانوی ٹوپی) میں ملبوس تھے۔
سارہ نے انسٹاگرام پر تصاویر شیئر کرتے ہوئے کیپشن لکھا لانجینز کے ساتھ ایک شاہی تقریب۔ان تصاویر کے سامنے آتے ہی دونوں کے مداحوں کی جانب سے دلچسپ تبصروں کا سلسلہ شروع ہو گیا ہے۔
ایک مداح نے لکھا یہ کتنا دیوانہ وار کراس اوور ہے، میں نے کبھی نہیں سوچا تھا کہ سارہ اور ہنری کو ایک ہی فریم میں دیکھوں گا، جبکہ ایک اور صارف نے لکھا ایک طرف پٹودی کی شہزادی ہے اور دوسری طرف سپر مین، دونوں ساتھ بہت اچھے لگ رہے ہیں۔
