The news is by your side.

Advertisement

سانحہ ماڈل ٹاؤن: گلوبٹ کیخلاف مقدمے کی سماعت5ستمبر تک ملتوی

لاہور : سانحہ ماڈل ٹاؤن کے مرکزی کردار گلو بٹ کیخلاف مقدمے کی سماعت پانچ ستمبر تک ملتوی کرتے ہوئے جیل بھیجنے کا حکم دے دیا۔

سانحہ ماڈل ٹاؤن کے مرکزی کردار گلو بٹ کو انسداد دہشت گردی کی خصوصی عدالت میں پیش کرکے پولیس نے گلو بٹ کیخلاف چالان پیش کیا گیا ، پولیس کی جانب سے مؤقف اختیار کیا گیا کہ امن و امان کے خدشے اور گلو بٹ کی جان کو خطرے کے باعث اسے نظر بند کر رکھا ہے، پولیس نے عبوری چالان میں گلو بٹ کو دہشت پھیلانے کا ذمہ دار قرار دیا ہے۔

پولیس نے عدالت کو بتایا کہ گلو بٹ نے منہاج القرآن کے باہر گاڑیوں کی توڑ پھوڑ کر کے دہشت پھیلائی۔ عدالت نے کیس کی سماعت 5 ستمبر تک ملتوی کرتے ہوئے جیل بھیجنے کا حکم دے دیا، آئندہ سماعت پر استغاثہ کے گواہوں کی شہادتیں قلمبند کرنے کی کارروائی شروع کی جائے گی۔

اس سے قبل انسداد دہشتگردی کی عدالت نے گلو بٹ کی جانب سے چار لاکھ کے مچلکے اور دو شخصی ضمانتیں جمع کرنے پر رہائی کے احکامات جاری کیے تھے، ملزم گلو بٹ پرعوامی ملکیتوں کو توڑ پھوڑ کے ذریعے نقصان پہنچانے کا الزام ہے۔

سترہ جون کو ماڈل ٹاؤن لاہورمیں عوامی تحریک کے کارکنوں اور پولیس کے درمیان جھڑپ کے دوران ٹی وی چینلز پر گلو بٹ کو گاڑیوں کے شیشے توڑتے ہوئے دکھایا گیا تھا۔

واضح رہے کہ بائیس جولائی کو لاہور کی انسداد دہشتگردی کی عدالت نے گلو بٹ کی ضمانت کی درخوست مسترد کردی تھی۔

Print Friendly, PDF & Email

Comments

comments

یہ بھی پڑھیں