کراچی :سندھ اسمبلی اجلاس میں تحریکِ انصاف کے چیئرمین عمران خان کے متنازعہ الفاظ کے خلاف پیش کی گئی قرارداد کثرت رائے سے منظور کرلی گئی ہے۔
سندھ اسمبلی قرارداد سینئر وزیرِ نثار کھوڑو نے پیش کی، ان کا کہنا تھا کہ جمہوریت کے لیے جانیں قربان کرنے والوں کوغلام کہنا سندھ کے باشعورعوام کی تذلیل ہے، عمران خان سندھ کے عوام سے معافی مانگیں۔
ایم کیو ایم کے رکن سندھ اسمبلی فیصل سبزواری کا کہنا تھا کہ عمران خان اپنے بیان میں سندھ کے لوگوں کی دل آزاری کی جس کی پُر زور مذمت کرتے ہیں، ڈپٹی اسپیکر شہلا رضا نے بھی عمران خان کو آڑے ہاتھوں لیا، ان کا کہنا تھا کہ عمران خان، تنقید خان ہیں، انہیں اپنےسوا سب میں خامیاں دکھائی دیتی ہیں۔
