لاہور: پاکستانی نژاد برطانوی باکسر عامرخان نے لاہور میں داتا دربار پر حاضری دی، عامرخان کا کہنا ہے کہ جب بھی فائیٹ کرتا ہوں، مقصد سبز ہلالی پرچم کو بلند کرنا ہوتا ہے۔

عالمی شہرت یافتہ باکسر عامر خان نے داتا دربار پر حاضری دی، اس موقع پر ان کی اہلیہ، بیٹی اور بھائی بھی ان کے ساتھ موجود تھے، عامر خان نے مزار پر چادر چرھائی اور فاتحہ پڑھی۔

میڈیا سے بات چیت میں عامر خان نے کہا کہ انہوں نے داتا دربار پر پاکستان کی خوشحالی کے لیے دعا کی، پاک سر زمین سے انہیں ہمیشہ عزت ملی، جب بھی مقابلہ کرتا ہوں، پاکستان کا پرچم بلند کرنے کے لیے کرتا ہوں۔

انہوں نے کہا کہ وہ دنیا کو بتانا چاہتے ہیں کہ پاکستان ایک محفوظ ملک ہے، وہ پاکستان میں باکسنگ کے لیے کچھ کرنا چاہتے ہیں کیوں کہ یہاں بہت ٹیلنٹ ہے اور اچھے کھلاڑی پیدا ہوسکتے ہیں۔