لاہور: قومی ایئرلائن کو اپنے ہی ملازمین نے بڑا مالی جھٹکا دے دیا،لاہور میں پی آئی اے کا ایک کروڑ روپے کا ٹیکس فراڈ سامنے آگیا۔
لاہور میں قومی ائیرلائن کے ملازمین کا ایک کروڑ روپے کا ٹیکس فراڈ سامنے آگیا۔ ٹیکس فراڈ کی تحقیقات کی دستاویزات اے آر وائی نیوز نے حاصل کرلیں۔
ذرائع کےمطابق عملے نے علامہ اقبال ایئرپورٹ پر یکم سے چوبیس اگست تک وصول کیا گیا ٹیکس ایئرلائن کے اکاؤنٹ میں جمع کرانے کے بجائے اپنی جیبوں میں ڈالا۔
لاہورایئرپورٹ پر چاروں شفٹوں کے انچارج فی مسافر5 ہزار روپے وصول کرتے رہے، ایئرپورٹ پرچاروں شفٹوں کے اسٹیشن مینجرز، ٹرمینل مینجر اورکاونٹر انچارجز کو فراڈ کی تحقیقات میں شامل کرلیا گیا ہے جبکہ ٹیکس فراڈ کی ابتدائی انکوائری رپورٹ وزیراعظم کے مشیر ہوابازی شجاعت عظیم کو بھیج دی گئی ہے۔
