site
stats
پاکستان

معصوم بچوں کی شہادت نے پوری قوم کو متحد کردیا، الطاف حسین

لندن: متحدہ قومی موومنٹ کے قائد الطاف حسین نے کہا ہے کہ سانحہ پشاور میں معصوم بچوں کی شہادت نے پوری قوم کو متحد کردیا ہے اور اب وقت آگیا ہے کہ پاک سرزمین کو طالبان دہشت گردوں سے ہمیشہ ہمیشہ کیلئے پاک کردیا جائے ۔

الطاف حسین نے سانحہ پشاور کے معصوم ننے منے بچوں اور اساتذہ کرام کے چالیسویں کے موقع پر شہیدوں کے لواحقین سے دلی تعزیت و ہمدردی کا اظہار کرتے ہوئے انہیں صبر کی تلقین کی اور دعا کی کہ اللہ تعالیٰ شہید بچوں کے صدقے پاکستان کو درندہ صفت طالبان سے ہمیشہ ہمیشہ کے لئے پاک کردے، الطاف حسین نے کہا کہ معصوم بچوں کا لہو رنگ لارہا ہے اور ان کی شہادتوں نے سوئی ہوئی قوم کو جگا کر طالبان دہشت گردوں کے خلاف متحدکردیا ہے ۔

الطاف حسین نے دعا کی کہ اللہ تعالیٰ پوری قوم کو متحد ومنظم کردے اور ملک کو مذہبی انتہاء پسندی اور دہشت گردی سے نجات دلائے ۔ انہوں نے کہا کہ اس سے قبل بھی پولیس اور ایف سی کی چوکیوں، فوج، نیوی، فضائیہ کے ہیڈکوارٹرز، جی ایچ کیو اور دیگرحساس مقامات پر دہشت گردوں نے کئی حملے کئے اورمسلح افواج کے افسروں،جوانوں سمیت ہزاروں بے گناہ افراد کوشہید کیا اگر اُس وقت میری باتوں پر توجہ دے دی جاتی اور دہشت گردوں کے خلاف کروائی کردی جاتی جس وقت یہ منظم ہورہے تھے تو آج ہمیں اتنی بھاری قیمت نہیں اٹھانی پڑتی۔

الطاف حسین نے کہا کہ آج بھی چند عناصر دہشت گردوں کے خلاف کاروائی سے ناخوش ہیں اور یہی وہ عناصر ہیں جو قوم کو الجھانے کی ناکام کوششوں میں مصروف ہیں، انہوں نے کہا کہ وقت آگیا ہے کہ پوری قوم مسلح افواج کا بھر پور ساتھ دیکر اپنی پاک افواج کے ہاتھوں کو مضبوط کرے اور دہشت گردو ں اور انکے سرپرستوں کے اصل چہرے بے نقاب ہوتے ہوئے دیکھ لے۔

الطاف حسین نے ایک مرتبہ پھر سانحہ پشاور میں شہید ہونے والے معصوم بچوں ، اساتذہ کرام اور فوجی اہلکاروں کے اہلِ خانہ سے دلی تعزیت اور ہمدردی کاا ظہار کیا جبکہ سانحہ میں زخمیوں کی جلد و مکمل صحتیابی کیلئے بھی خصوصی دعائیں کیں۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top