پاکستان سمیت دنیا بھرمیں زمین پر ماحولیاتی اثرات کو کم کرنے کے لئے ارتھ آور ڈے آج منایا جا رہا ہے۔
آرتھ آور ڈے منانے کا مقصد دنیا میں ہونے والی ماحولیاتی تبدیلیوں کے اثرات کو کم کرنا ہے، یہ دن ہرسال مارچ کے آخری ہفتہ کو منایا جاتا ہے۔
گزشتہ برس دنیا بھر میں تقریبا سات ہزار چھوٹے بڑے شہروں میں ارتھ آور ڈے منایا گیا تھا، اس دن لوگ رات ساڑھے آٹھ بجے سے ساڑھے نو بجے تک ایک گھنٹہ اضافی لائٹس بند کرکے دنیا کے بڑھتے ہوئے درجہ حرارت کو کم کرنے کی کوشش کرتے ہیں۔
کمشنر کراچی شعیب احمد صدیقی نے شہریوں سے اپیل کی ہے کہ رات ساڑے آٹھ بجے سے ساڑھے نو بجے تک تمام غیر ضروری لائٹس بند رکھیں، زمین کی حفاظت کی تحریک میں بھرپورحصہ لیں، پبلک سیفٹی والی لائٹس بند نہیں کی جائیں گی۔
ڈبلیو ڈبلیو ایف کی جانب سے پاکستان میں عائشہ عمر، عائشہ خان ، عمیرعباسی اور صبا پرویز کو ارتھ آور کا سفیر مقرر کیا گیا ہے۔
کراچی دنیا کے دیگر سات ہزار شہروں کی طرح ڈبلیو ڈبلیو ایف کے ساتھ ارتھ ڈے منانے والے شہروں میں شامل ہوگیا ہے۔
ارتھ ڈے کے موقع پر ملک بھر کے تمام ایئرپورٹس پر بھی رات ساڑے آٹھ بجے سے ساڑھے نو بجے تک تمام غیر ضروری لائٹس بند رکھی جائے گی، رن وے کے علاوہ اور جہازوں کی رہنمائی کرنے والی لائٹیں بند نہیں کی جائیں گی۔
