لاہور: پیر محل میں معروف روحانی شخصیت حضرت پیر خالد ظفر قدوائی رحمت اللہ علیہ کے مزار پرخواجہ غریب نواز ویلفیئر ٹرسٹ کے زیراہتمام دسترخوان کا آغاز ہو گیا۔
۔
پیر محل کے علاقے رحمت ٹاؤن میں برصغیر کی معروف روحانی ہستی حضرت پیر خالد ظفر قدوائی رحمت اللہ علیہ آسودہ خاک ہیں ۔ ان کے مزارِ مبارک پر خواجہ غریب نواز ویلفیئر ٹرسٹ کے زیراہتمام مسجد اور مدرسے کے قیام کے بعد ٹرسٹ کے چیئرمین جناب حاجی عبدالرؤف نے دسترخوان کا بھی آغاز کر دیا جہاں غریب افراد کو روزانہ دو وقت کھانا پیش کیا جاتا ہے۔
خطیب مسجدِعائشہؓ قاری محمد افضل کا کہنا ہے کہ خواجہ غریب نواز ویلفیئر ٹرسٹ کے اس دسترخوان سے جہاں مقامی غریب افراد کھانا کھا سکیں گے وہاں قرب و جوار کے ہزاروں مستحقین بھی مستفید ہوں گے۔
دسترخوان پر کھانا کھانے والے افراد ٹرسٹ اور جناب حاجی عبدالرؤف کے ممنون نظر آتے ہیں ۔ دوسرے شہروں سے مزار مبارک پر حاضری کے لئے آنے والے عقیدت مند بھی ٹرسٹ کے اس اقدام کو مستحسن قرار دیتے ہیں ۔
