لاہور : شہر کے علاقے گرین ٹاؤن میں درندہ صفت انسان نے چھ سالہ معصوم بچے کو بے دردی سے قتل کرنے کے بعد اس کی لاش محلے کی ایک مسجد کی چھت سے لٹکا دی۔
تفصیلات کے مطابق گرین ٹاؤن کے رہائشی رنگ ساز یاسین کا چھ سالہ بیٹا معین گذشتہ رات گھر سے لاپتہ ہواتھا ، جس کی ہر جگہ تلاش کی گئی اور پولیس کو بھی اس کے گم ہونے کی اطلاع دی گئی لیکن معین کا کوئی سراغ نہ ملا۔
آج نماز جمعہ کے وقت مسجد میں اعلان سننے کے بعد جب بچے کے والدین مسجد پہنچے تو ان کے لخت جگر کی لاش رسی سے جھول رہی تھی۔
پولیس نے امام مسجد سمیت تین افراد کو حراست میں کر تفتیش شروع کردی ہے، ایس پی صدر ڈویژن اعجاز شفیع ڈوگر کا کہنا ہے کہ واقعہ جنسی تشدد کا لگتا ہے۔ بچے کے والدین نے مطالبہ کیا ہے قاتلوں کو سخت سے سخت سزا دی جائے۔
