پشاور: خیبر پختونخواہ حکومت نے ڈاکٹر شکیل آفریدی کو مردان جیل منتقل کرنے کا فیصلہ کرلیا ہے۔
تفصیلات کے مطابق اسامہ بن لادن کی پاکستان میں موجودگی کے بارے میں امریکہ کو خفیہ معلومات فراہم کرنے کے مجرم ڈاکٹر شکیل آفریدی کوسینٹرل جیل پشاور سے مردان ہائی سیکیورٹی سیل منتقل کیا جارہا ہے جبکہ سابق صدر پرویز مشرف پرحملے کے مرکزی مجرم نیاز محمد کو بھی ہری پور جیل سے مردان منتقل کیا جارہا ہے۔
ذرائع کا کہنا ہے کہ بنوں اور مردان میں جیل پر ہونے والے حملوں کے بعد مردان جیل کو بم پروف بنا کر ہائی سیکیورٹی سیل میں تبدیل کیا گیا ہے جہاں انتہائی نوعیت کے حامل مجرموں کو منتقل کیا جائے گا۔
ذرائع کا کہنا ہے کہ جون 2009 میں گرفتار کئے جانے والے تحریکِ نفاذِ شریعتِ محمدی کےسربراہ صوفی محمد کو بھی پشاور جیل سے مردان جیل منتقل کرنے کا فیصلہ کیا گیا ہے حالانکہ صوفی محمد نے اس فیصلے پراپنے تحفظات کا اظہار کیا ہے۔
سید فواد رضا اے آروائی نیوز کی آن لائن ڈیسک پر نیوز ایڈیٹر کے فرائض انجام دے رہے ہیں‘ انہوں نے جامعہ کراچی کے شعبہ تاریخ سے بی ایس کیا ہے اور ملک کی سیاسی اور سماجی صورتحال پرتنقیدی نظر رکھتے ہیں
