site
stats
پاکستان

کراچی:فائرنگ کے مختلف واقعات، 8افراد ہلاک

کراچی:  فائرنگ کے مختلف واقعات میں دو پولیس اور ایک اے ایس ایف اہلکار سمیت8 افراد کو موت کی نیند سلادیا گیا، ماڑی پور ، سچل ، سہراب گوٹھ اور موچکو میں مبینہ مقابلوں میں گینگ وار اور کالعدم تنظیم کے پانچ ملزمان مارے گئے۔

پولیس کے مطابق میوہ شاہ قبرستان کے قریب نامعلوم افراد کی فائرنگ سے ایک شخص جاں بحق اور ایک زخمی ہوا، گولیمار پیتل گلی سے ایک شخص کی گھر سے لاش ملی، جسے فائرنگ کرکے قتل کیا گیا تھا۔ اورنگی ٹاون کے علاقے ایم پی آر کالونی میں نامعلوم افراد کی فائرنگ سے اصغر نامی شخص جان سے گیا ۔

اورنگی کے علاقے پیرآباد میں فائرنگ سے پولیس اہلکار یوسف خان جاں بحق ہوا، مقتول ہیڈ کانسٹیبل یوسف پیرآباد تھانے میں تعینات تھا،  ناظم آباد کے علاقے پاپوش نگر میں فائرنگ سے زخمی ہونے والا پولیس اہلکار مشتاق جانبر نہ ہوسکا، ادھر لیاری کے علاقے پھول پتی لین میں گینگ وار تصادم فائرنگ سے گینگ وار کا رکن سمد ہلاک ہوگیا، شیرشاہ میں بینک کو رقم فراہم کرنیوالی کیش وین لوٹنے کے دوران ڈاکوؤں نے نور خان سیکیورٹی گارڈ کو فائرنگ کرکے قتل کردیا ۔

لیاری میں نامعلوم افراد نے کلری تھانے پر دستی بم حملہ اورفائرنگ کردی، جسکے نتیجے میں دو پولیس اہلکار زخمی ہوگئے۔ پہلوان گوٹھ میں اے ایس ایف اہلکار عبد الغنی نامعلوم افراد نے گولیاں مار کر ابدی نیند سلا دیا، ماڑی پور بھی پولیس مقابلے میں مختلف جرائم میں ملوث ایک ملزم مارا گیا، سچل کے علاقے میں پولیس اہلکاروں سمیت دیگر افراد کی ٹارگٹ کلنگ میں ملوث کالعدم تنظیم کا کارندہ رفیع اللہ مبینہ پولیس مقابلے میں ہلاک ہوگیا۔

سہراب گوٹھ کے علاقے میں ملزمان اور پولیس کے درمیان مبینہ پولیس مقابلے میں گینگ وار کا ملزم ملا عمر ساتھی سمیت ہلاک ہوگیا، ادھرموچکو پانچ سو کوارٹر میں رینجرز سے مقابلے میں گینگ وار کا ملزم سعید کمانڈو ہلاک ہوگیا، رینجرز ترجمان کے مطابق ملزم کا تعلق لیاری گینگ وار سے ہے ملزم مواچھ گوٹھ میں پانچ افراد کے قتل سمیت دیگر سنگین نوعیت کے جرائم میں ملوث تھا۔

دوسری جانب مچھر کالونی سے سی آئی ڈی پولیس نے ٹارگٹ کلنگ میں ملوث ملزم اعجاز عرف کپی کو گرفتار کرکے اسلحہ برآمد کرلیا، پولیس کے مطابق ملزم نے دوران تفتیش ٹارگٹ کلنگ اور اسٹریٹ کرائم کی سو سے زائد وارداتوں کا انکشاف کیا ہے، رینجرز نے سائٹ سیمنز چورنگی کے قریب کارروائی کرتے ہوئے خالی پلاٹ میں چھپائے 66 راکٹوں کے شیل برآمد کرلیے، ترجمان رینجرز کے مطابق دہشت گرد ان راکٹوں سے بڑی تباہی پھیلا سکتے تھے۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top