کراچی کے علاقے مشرف کالونی میں پولیس مقابلے میں تحریک طالبان کے تین مبینہ دہشتگرد ہلاک ہو گئے، مقابلے میں دو پولیس اہلکار بھی زخمی ہوئے۔
کراچی کے علاقے مشرف کالونی میں پولیس اور دہشتگردوں کے مابین فائرنگ کا تبادلہ ہوگیا، مقابلے دوران دہشتگردوں کی جانب سے پھینکے گئے گرنیڈ سے دو پولیس اہلکار زخمی ہوگئے، مقابلے میں تین دہشت گرد بھی مارے گئے۔
پولیس کے مطابق دہشتگردوں کا تعلق تحریک طالبان پاکستان سے ہے، ادھر سکھن پولیس نے کارروائی کے دوران ڈکیتی میں ملوث چار ملزمان کو حراست میں لے کر چھینے گئے موبائل اور دیگر سامان برآمد کرلیا۔
دوسری جانب شہر میں پر تشدد واقعات کا سلسلہ بھی جاری ہے۔ کراچی کے علاقے ملیر ملت ٹاون میں جامعہ مسجد الجنت سے متصل مدرسہ میں پارسل پیکٹ دھماکے میں تین افراد زخمی ہوگئے جنھیں طبی امداد کیلئے جناح اسپتال لایا گیا۔
پولیس کے مطابق اس بات پر تحقیقات کی جارہی ہے کہ پارسل کہاں سے آیا تھا دھماکے کے فوری بعد پولیس اور رینجرز کی بھاری نفری پہنچ گئی۔
