کراچی میں جرائم کی روک تھام کے لئے شروع کئے گئے ٹارگٹڈ آپریشن کو ایک سو چھتیس روز گزر گئے، پندرہ ہزار سے زائد جرائم پیشہ افراد کی گرفتاری کے باوجود شہر میں قتل کا بازار گرم ہے۔
جرائم کی بیخ کنی کے لئے شروع کئے گئے آپریشن کو ایک سو چھتیس روز گزر گئے، آپریشن وزیراعلیٰ کی کپتانی میں پولیس اور رینجرز کی مدد سے شروع کیا گیا۔
ذرائع کے مطابق کم و بیش چار مہینے سے جاری آپریشن کے دوران قانون کے رکھوالوں نے ہزاروں مشتبہ افراد کو حراست میں لیا، پولیس اور رینجرز نے شہر بھر میں کم وبیش نو ہزار کے قریب کارروائیاں کیں۔
پانچ سو سے زائد مقابلوں میں سو کے لگ بھگ ملزم مارے گئے، گرفتار ملزمان میں بڑی تعداد ٹارگٹ کلرز، اغواکار، بھتہ خوروں کی ہے، ٹارگٹڈ کارروائیوں میں تین ہزار سے زائد مخلتف اقسام کے ہتھیار بھی برآمد ہوئے۔
اس دوران حکومتی رٹ قائم کرنے کی کوشش میں سیکیورٹی اداروں کے چالیس سے زائد اہلکار جاں بحق ہوئے، کراچی آپریشن کا تیسرا مرحلہ جاری ہے، جرائم کی وارداتوں میں کمی محسوس تو ہوئی لیکن قتل و غارت گری اب بھی تھمی نہیں۔
پولیس میں تقرریوں تبادلوں کی بازگشت کے بعد رینجرز حکام کی برہمی بھی ایک مسئلہ بنی ہوئی ہے، آپریشن کا تیسرا مرحلہ تیز تر تھا لیکن ٹارگٹ کلنگ کی وارداتوں نے بھی تیزی اختیار کرلی ہے۔
