کراچی: پیپلزپارٹی کے شریک چیئرمین آصف علی زرداری نے کہا ہے کہ ہارس ٹریڈنگ کو روکنے کیلئے تمام سیاسی جماعتوں پرمشتمل آل پارٹیزکانفرنس بلاکردھاندلی اورہارس ٹریڈنگ کو جڑسے اکھاڑپھینکنے کے لئے مسئلے کا مستقل حل تلاش کیاجائے۔
اپنے ایک بیان میں پیپلزپارٹی کے شریک چیئرمین نے کہا ہے کہ دھاندلی کا مسئلہ تنہاحکومت کو نہیں بلکہ تمام سیاسی جماعتوں کو مل کرحل کرنا ہوگا،اگر حکومت اس معاملے کو حل کرنا چاہتی ہے تو اس کیلئے سنجیدہ اقدامات بھی اٹھائے الفاظ کی جادوگری سے ہارس ٹریڈنگ کامسئلہ حل نہیں ہوسکتا۔
آصف علی زرداری کاکہنا ہے کہ دھاندلی کے خاتمے کیلئے موثراقدامات کی ضرورت ہے اور اس معاملے کا حل بھی تلاش کیا جائے جس کیلئے عمران خان نے دھرنا دیا، اگر سیاست دان تدبرکا مظاہرہ نہ کرتے تو خدشہ تھا کہ بحران مزید سنگین ہوجاتا۔
آصف علی زرداری کا کہنا ہے دھاندلی اورہارس ٹریڈنگ کی روک تھام کیلئے جامع الیکٹرول ریفارم کی ضرورت ہے۔
اگرحکومت سنجیدہ ہے تو ایسے اقدامات اٹھائے جس سے صرف سینیٹ نہیں بلکہ چاروں صوبائی اسمبلیوں اوربلدیاتی انتخابات میں دھاندلی اورہارس ٹریڈنگ کا راستہ روکا جاسکے۔
واضح رہے کہ اس سے قبل پیپلز پارٹی کے رہنماء اوراپوزیشن لیڈرخورشید شاہ کہہ چکے ہیں کہ موجودہ آئین کے تحت انتخابی شیڈول جاری ہوجانے کے بعد طریقہٗ انتخاب میں ترمیم غیرآئینی ہوگی۔
