The news is by your side.

Advertisement

کشمیر و فلسطین کی جدوجہد آزادی اور مظالم میں مماثلت ہے، او آئی سی اقدامات کرے، شفقت محمود

اسلام آباد : وفاقی وزیر تعلیم شفقت محمود نے کہا ہے کہ کشمیراور فلسطین کی جدوجہد آزادی اور وہاں ہونے والے مظالم میں مماثلت ہے، امید ہے او آئی سی اسرائیل کو غیر قانونی اقدامات سے روکے گی۔

یہ بات انہوں نے اسلامی تعاون تنظیم وزرائے خارجہ کونسل کے16ویں غیر معمولی اجلاس سے خطاب کرتے ہوئے کہی۔

تفصیلات کے مطابق ترجمان دفتر خارجہ ڈاکٹر محمد فیصل نے کہا ہے کہ اسلامی تعاون تنظیم وزرائے خارجہ کونسل کے16ویں غیر معمولی اجلاس میں پاکستان کی جانب سے شفقت محمود نے اجلاس میں نمائندگی کی۔

وزرائے خارجہ کونسل کا اجلاس سعودی عرب کی درخواست پر بلایا گیا تھا، پاکستان کی جانب سے وفاقی وزیر تعلیم شفقت محمود نے اجلاس میں نمائندگی کی۔

ترجمان دفترخارجہ کے مطابق مذکورہ اجلاس اسرائیلی وزیراعظم کے مغربی کنارے پر قبضے کے بیان پر بلایا گیا، اس حوالے سے اسرائیلی وزیراعظم کا بیان انتہائی غیر ذمہ دارانہ اور اقوام متحدہ کی قراردادوں کی سنگین خلاف ورزی ہے۔

اجلاس سے خطاب میں شفقت محمود نے فلسطین کو پاکستان کی جانب سے ہرحمایت کی یقین دہانی کرائی اور کہا کہ امید ہے او آئی سی اسرائیل کو غیر قانونی اقدامات سے روکے گی۔

وفاقی وزیر تعلیم کا کہنا تھا کہ کشمیراور فلسطین کی جدوجہد آزادی اور وہاں ہونے والے مظالم میں مماثلت ہے، بھارت نے غیرقانونی اقدام سے مقبوضہ کشمیر کو جیل بنادیا ہے۔

وادی میں مکمل لاک ڈاؤن، ذرائع ابلاغ بند اور دواؤں کی قلت ہے، کاروبار، اسکول اور کالجز بھی بند ہیں، اس کے علاوہ عالمی میڈیا معمولات زندگی بحال ہونے کے بھارتی دعووں کی نفی کررہا ہے۔

ترجمان دفترخارجہ کے مطابق اس موقع پر شفقت محمود نے اوآئی سی کے سیکریٹری جنرل و دیگر رکن ممالک کے وزراء سے ملاقات کی اور انہیں کشمیر کی موجودہ صورتحال سے آگاہ کیا۔

Comments

comments

یہ بھی پڑھیں