آج اردو کے مشہور ادیب، نقاد اور محقق ڈاکٹرانورسدید کی تاریخ پیدائش ہے ۔ وہ 4 دسمبر 1928ء کو قصبہ میانی تحصیل بھلوال ، ضلع سرگودھا میں پیدا ہوئے تھے۔
ڈاکٹر انور سدید نے ابتدائی تعلیم سرگودھا اور ڈیرہ غازی خان میں حاصل کی۔ 1944ء میں ایف ایس سی کے لیے اسلامیہ کالج لاہورمیں داخلہ لیا لیکن تحریک پاکستان میں سرگرمیوں کی وجہ سے امتحان نہ دے سکے۔ گورنمنٹ انجینئرنگ سکول منڈی بہائوالدین سے سول انجینئرنگ کا ڈپلوما اوّل بدرجہ اوّل میں گولڈ میڈل کے ساتھ حاصل کیا اور محکمہ آبپاشی پنجاب میں ملازمت اختیار کی دوران ملازمت انہوں نے اردو ادب میں ایم اے اور پی ایچ ڈی کی اسناد حاصل کیں۔
وہ اسی سے زیادہ کتابوں کے مصنف ہیں جن میں اردو ادب کی تحریکیں، اردو ادب میں سفرنامہ، پاکستان میں ادبی رسائل کی تاریخ ،میر انیس کی اقلیم سخن، اردو افسانے کی کروٹیں، اُردو افسا نے میں دیہات کی پیشکش اور اردو ادب کی ایک مختصر تاریخ سر فہرست ہیں۔
وہ کئی اخبارات اور جرائد کی مجلس ادارت میں بھی شامل رہے، آج کل لاہور میں مقیم ہیں۔