کولمبیا : اسمارٹ فون ایپ اور اس سے منسلک ایک کٹ کے زریعے اب ایڈز کی تشخیص ممکن ہوسکے گی۔
یونیورسٹی آف کولمبیا کے ماہرین نے ایک موبائل فون کٹ ایجاد کی ہے، جس میں ایک ایپ بھی شامل ہے، جو خون کا نمونہ لے کر پندرہ منٹ کے اندر ایڈز جیسی بیماریوں کی تشخیص کرسکتی ہے۔
تشخیص کا یہ طریقہ روایتی طریقے کی نسبت تقریباً پانچ سو گنا سستا ہے اور یہ کٹ اور ایپ کسی بھی قسم کے اسمارٹ فون یا کمپیوٹر کے ساتھ استعمال کی جاسکتی ہے۔
کولمبیا یونیورسٹی کے پروفیسر سیموئل سیا کا کہنا ہے کہ ایک تشخیصی کٹ تقریباً 22برطانوی پاﺅنڈ (تقریباً3500روپے) میں تیار ہوجاتی ہے، ان کا یہ بھی کہنا تھا کہ جلد ہی اس تشخیصی کٹ کو ترقی پذیر ممالک میں بھی متعارف کروایا جائے گا تاکہ صحت کی سہولت سے محروم علاقوں میں لوگ اس سے فائدہ اٹھا سکیں۔
اس ایپ کی تیاری کے لئے کی گئی تحقیق کو سائنسی جریدے ”سائنس ٹرانسلیشنل میڈیسن“ میں شائع کیا گیا ہے۔
