کراچی: الطاف حسین نے پارٹی کے تمام وزراء، سینیٹرز، ایم این ایز، ایم پی ایز اور دیگر تنظیمی ذمہ داران سے شمولیت کے وقت سے لیکر آج تک کے اثاثوں کی تفصیل جمع کرنے کے لیے کمیٹی تشکیل دے دی۔
متحدہ قومی موومنٹ کے قائد الطاف حسین کی جانب سے پارٹی میں اصلاح کے لیے اقدامات جاری ہیں، رابطہ کمیٹی پاکستان اور لندن کے ایک مشترکہ اجلاس میں الطاف حسین نے رکن رابطہ کمیٹی کنور خالد یونس کی سربراہی میں ایک کمیٹی تشکیل دی ہے جو پارٹی کے تمام وزراء، سینیٹرز، ایم این ایز، ایم پی ایز اور دیگر تنظیمی ذمہ داران سے شمولیت کے وقت سے لیکر آج تک کے اثاثوں کی تفصیلات جمع کرکےالطاف حسین کو پیش کرے گی۔
الطاف حسین نے تمام ایم این ایز، ایم پی ایز، وزراء اور عہدیداران کو آخری وارننگ دیتے ہوئے کہا ہے کہ وہ کارکنان اور شہداء کے لواحقین کے ساتھ عزت و احترام سے پیش آئیں انہیں اپنا نوکر، ہاری یا مزارع نہ سمجھیں، الطاف حسین نے ایک اور فیصلہ میں رابطہ کمیٹی کو ہدایت کی ہے کہ ایم کیو ایم کا کوئی وزیر یا رابطہ کمیٹی کا رکن شادی وغیرہ کی تقریبات میں شریک نہیں ہوگا، سیکٹر، یونٹ، علاقے کا ایم این اے اور ایک ایم پی اے شرکت کرنے کے حقدار ہوں گے۔
