واشنگٹن: آنے والا نیا سال صدر اوباما کیلئے کئی سیاسی ، اقتصادی اور سیکورٹی چیلنجز لے کر آرہا ہے جبکہ 2014 بھی اوباما انتظامیہ کیلئے کافی مشکل سال رہا ۔
اس بات میں کوئی شک نہیں کہ 2014 اوباما انتظامیہ کیلئے مشکل سال تھا، وسط مدتی انتخابات میں ڈیموکریٹس کو شکست، ری پبلکنز کادونوں ایوانوں پر غلبہ، داعش کا ایک مضبوط اور منظم دہشت گرد تنظیم کے طور پر اُبھرنا اور افغانستان سے امریکی افواج کی واپسی ۔ تاہم ان سب واقعات کے باوجود صدر اوباما کا رویہ جارحانہ رہا۔
شدید سیاسی مخالفت کے باوجود امریکی صدر نے رواں برس امیگریشن اصلاحات کا اعلان کیا، جس سے امریکہ میں غیر قانونی طور پر مقیم قریب پچاس لاکھ افراد ملک بدری سے بچ سکیں گے، صدر اوباما نے امریکہ اور کیوبا کے پانچ دہائیوں کی سرد مہری کے بعد سفارتی تعلقات بحال کرنے کا فیصلہ کیا۔
امریکی صدر نے فیکٹریوں سے نکلنے والے گرین ہاؤس گیسوں کے اخراج کو کم کرنے لئے قانون پر بھی دستخط کئے، رواں سال امریکی صدر براک اوباما افغانستان سے امریکی فوج کے انخلاء اور گوانتاناموبے کے قید خانے کو بند کرنے کے لئے پُر عزم نظر آئے جبکہ سونی پکچرز پر ہیکرز کے حملے پر بھی صدر اوباما نے جارحانہ انداز اپنائے رکھا۔
صدر اوباما ہمیشہ سے ہی امریکہ میں مقیم سیاہ فام کمیونٹی کے نمائندے کے طور پر دیکھے جاتے ہیں لیکن ان کے ہی دور اقتدار میں کئی نہتے سیاہ فام نوجوانوں کو سفید فام پولیس اہلکاروں نے قتل کیا، جس پر امریکہ بھر میں شدید مظاہرے بھی ہوئے لیکن کسی پولیس اہلکار کو سزا نہیں دی گئی۔
سیاہ فام کمیونٹی سال 2014 میں براک اوباما کی کامیابیوں اور ناکامیوں پر ملے جلے ردِعمل کا اظہار کرتی نظر آتی ہے۔
امریکہ میں آنے والا نیا سال صدر اوباما کیلئے کئی چیلنجز لے کر آرہا ہے جس میں ملک میں نئے ٹیکس عائد کرنے کے ساتھ ساتھ نئی تجارتی پالیسی بھی شامل ہے۔
امید کی جارہی ہے کہ نئے سال میں وائٹ ہاؤس اقتصادی تبدیلیوں پر زور دے گا، جس کا مقصد مڈل کلاس افراد کی زندگیوں میں بڑی تبدیلی لانا ہے۔
