نوڈیرو: سابق صدرآصف زرداری نے کہا ہے کہ سعودی عرب اورخلیج کےملکوں میں لاکھوں پاکستانی کام کرتےہیں،وہاں سیاسی تبدیلی پاکستان کےمفادمیں نہیں۔
ذوالفقار علی بھٹو کی برسی پر جلسے سے خطاب کرتے ہوئے پیپلز پارٹی کے شریک چیئرمین آصف علی زرداری کا کہنا تھا کہ ملک کوشہیدوں کےلہوکی ضرورت ہے،آج تاریخ شہیدوں کےلہوکاحساب مانگ رہی ہے،ہمارے بچوں کوماضی کی آگ سے آج بھی خطرہ ہے، بھٹو نے لکھا تھا کہ میرے جانے کے بعد ہمالیہ روئیں گے۔
یمن کے معاملے پر سابق صدر کا کہنا تھا کہ پارلیمنٹ میں بات کی جائے ، اسلامی دنیا میں ہر ملک آخر کیوں پریشان ہے،انہوں نے کہا کہ بیس لاکھ پاکستانی سعودی عرب اوردس لاکھ گلف میں کام کرتےہیں،ان ملکوں کی سلامتی پاکستان کی اقتصادی ضرورت ہے، کسی کوسعودی عرب کی سلامتی خطرےمیں ڈالنےکی اجازت نہیں دے سکتے،حرمین شریفین کی ہم سب عزت اورخدمت کرتے ہیں، ہرمسلمان حرم شریف کے لیے اپنی جان دے سکتا ہے۔
آصف زرداری نےکہا کہ مسلمانوں کولڑانےوالوں کےاپنےعزائم ہیں،انہیں اپنےہتھیاربھی بیچنا ہیں،انہوں نے حکومت کومشورہ دیا کہ مدد اتنی ہی کریں جتنا بوجھ اٹھاسکیں۔
انہوں نے وزیراعظم نوازشریف سےشکوہ کیا کہ وہ چھوٹے صوبوں سےزیادتی بھی کرتے ہیں اورمشورہ بھی نہیں کرتے، سندھ میں اٹھارہ گھنٹےلوڈشیڈنگ کرائی جارہی ہے۔
آصف زردری نے عمران خان کومشورہ دیا کہ وہ پارلیمنٹ میں آئیں،الیکشن کمیشن کومالی لحاظ سےخودمختاربنانےکے لیے اپوزیشن کاہاتھ بٹائیں۔
اس سے قبل پیپلزپارٹی کےرہنمااعتزازاحسن نے کہا کہ وزیراعظم صرف ترکی ہوکر آگئے،امت مسلمہ کو بھٹو جیسے رہنما کی ضرورت ہے جوتمام مسلم ملکوں کومتحد کرکے یمن کامسئلہ حل کرتا۔
تقریب میں وزیراعلٰی سندھ قائم علی شاہ نےعلامہ اقبال کامسلمانوں کےلیےکہا گیا شعرجیالوں کےلیےپڑھ دیا، انہوں نے کہا آصف زرداری جب مشورہ دیتےہیں توسب انہیں سلام کرتےہیں۔
