کراچی: آرمی چیف جنرل راحیل شریف کہتے ہیں دہشتگردی کا بہادری سے سامنا کرنے پر پاکستان دنیا کیلئے مثال ہے اور خطے میں پائیدار امن کیلئے کشمیر کے مسئلے کا حل ضروری ہے۔
آرمی چیف جنرل راحیل شریف نے آج کراچی ایکسپو سینٹرمیں دفاعی نمائش آئیڈیاز2014 کے دورے کے دوران مختلف اسٹالز کا معائنہ کیا۔ جس کے بعد دفاعی نمائش میں تقریب سے خطاب کے دوران آرمی چیف نے کہا کہ فلسطین اور کمشمیر جیسے تنازعات سے خطے کی سیکورٹی خطرے میں پڑسکتی ہے۔
آرمی چیف جنرل راحیل شریف کا کہنا تھا کہ ملکی سیکورٹی پڑوسی ممالک کی صورتحال پر بھی منحصر ہے اور بدلتےحالات کے ساتھ دفاعی ضروریات بھی تبدیل ہو رہی ہیں۔ انھوں نےکہا کہ موجودہ میکنزم نان اسٹیٹ ایکٹرز سے نمٹنے کیلئے ناکافی ہے۔
آرمی چیف نے کہا کہ گلوبلائزیشن سے جہاں دنیا قریب آئی، وہاں غیر ریاستی عناصر بھی اکھٹے ہوگئے ہیں اور غیر ریاستی عناصر پر قابو نہ پایا گیا تو صورتحال مزید گھمبیر ہوسکتی ہے۔
جنرل راحیل کا کہنا تھا کہ پاکستانی قوم انتہائی بہادر اور باہمت ہے تاہم ہمیں اپنے نظریات کے تحفظ کیلئے کام کرنا ہوگا۔
