اسلام آباد: قومی اسمبلی میں قائدِ حزب اختلاف سید خورشید احمد شاہ نے وزیرِاعظم نواز شریف سے ملاقات کی، ملاقات میں چیف الیکشن کمشنر کے تقرری پر مشاورت کی گئی۔
اپوزیشن لیڈر خورشید شاہ نے وزیرِاعظم سے ملاقات کے بعد بتایا کہ نئے چیف الیکشن کمشنرکے لیے تین نام آج کی ملاقات میں پیش کیئے گئے ہیں ، ان کی جانب سے رانا بھگوان داس اور ریٹائرڈ جسٹس اجمل میاں کا نام دیا گیا مگر وزیرِاعظم نے سابق سیکرٹری قانون ہونے کے باعث اجمل میاں کے نام پر اعتراض کیا۔
انہوں نے کہا کہ رانا بھگوان داس کے لیئے آئین میں ترمیم کی ضرورت ہے اور وہ خود بھی اس عہدے کے لیئے رضا مند نہیں ہیں، انہوں نے کہا کہ وزیرِاعظم نے جسٹس ریٹائرڈ سعید الزماں صدیقی کا نام دیا مگر وہ ن لیگ کے صدارتی امیدوار تھے، اس لیے ان کی جانب سے اعتراض آیا۔
خورشید شاہ نے بتایا کہ پی ٹی آئی، جماعت اسلامی اور دیگر اپوزیشن جماعتوں سے بھی چیف الیکشن کمشنر کے نام پر مشاورت کی جائے گی، انہوں نے توقع ظاہر کی کہ تیرہ نومبر سے قبل چیف الیکشن کمشنر کے نام کو حتمی شکل دے دی جائے گی۔
