کوئٹہ : وزیرِ اعظم نوازشریف نے کوئٹہ میں انسدادِ دہشتگردی کے خصوصی دستے کی پاسنگ آؤٹ پریڈ سے خطاب کرتے ہوئے کہا کہ پاسنک آؤٹ پریڈ میں شرکت میرے لئے باعث مسرت ہے، افسروں اور نوجوانوں نے حکمت عملی کا مظاہرہ کیا۔
نواز شریف نے کہا کہ جہاں ایسے جاں باز سپاہی ہوں اس قوم کو کوئی شکست نہیں دے سکتا۔
انھوں نے کہا کہ اس بات کو نظر انداز نہیں کیا جا سکتا کہ پاکستان اس وقت دہشت گردی کی زد میں ہے، ہم کو ہمت ، صبر سے دہشت گردی کا مقابلہ کرنا ہوگا، حکومت نے با صلاحیت نوجوانوں پر مشتمل انسدادِ دہشت گردی فورس بنائی۔
وزیرِ اعظم نے کہا کہ پاس آؤٹ ہونے والے نوجوانوں کو مبارک باد دیتا ہوں پاس آؤٹ ہونے والے نوجوان غیر جانبداری سے اپنے فرائض انجام دیں، بلوچستان پولیس اور حکومت کو بھی کامیاب تربیت پر مبارک باد پیش کرتا ہوں۔
نواز شریف کا آپریشن ضربِ عضب کے حوالے سے کہنا تھا کہ دہشت گردی کے خلاف آپریشن کو منطقی انجام تک پہنچائیں گے اور ملک کو دہشت گردی سے پاک کرنے تک چین سے نہیں بیٹھے گے، ہم نے دہشت گردی کے خلاف جنگ ہر حال میں جیتنی ہیں۔
انھوں نے کہا کہ پوری قوم اور ادارے دہشتگردی کیخلاف متحد ہیں، دہشتگردی کیخلاف جنگ ہمارے مستقبل کا مسئلہ ہے۔
