اسلام آباد : دنیا بھر کے ممالک اپنی افواج میں اسپیشل سروسز کیلئے خصوصی فورس تشکیل دیتی ہیں، پاکستان کا یہ اعزاز ہے کہ اسپیشل سروسز گروپ کو دنیا کی دس بہترین اسپیشل آپریشن فورسز میں شامل کیا گیا ہے۔
اسپیشل سروسزگروپ پاکستان آرمی کو بین الاقوامی جریدے نے دنیا کی دس بہترین اسپیشل آپریشن فورسز میں شامل کیاہے،سیاچن کےیخ بستہ میدان ہوں یا سمندر کی گہرائیاں، پاکستانی کمانڈوز اپنے ہدف کونکلنے نہیں دیتے، بین الاقوامی جریدے آرمڈ فورسز ہسٹری میوزیم کے مطابق پاکستانی ایس ایس جیز کواسپیشل آپریشنز،انسداد دہشتگردی، یرغمالیوں کی بحالی،فارن انٹرنل ڈیفنس، ڈائریکٹ ایکشن،حساس معاملات کی تحقیقات میں دنیا کی کئی اسپیشل سروسز پر برتری حاصل ہے،اس کی غیرمعمولی حربی صلاحیت اس کے وقاراوردبدبے میں اضافہ کرتی ہے۔
بین الاقوامی جریدے نے پاکستانی ایس ایس جیز کو امریکی گرین بیریٹس اور برطانوی ایس اے ایس کے ہم پلہ قرار دیا ہے، جو بین الاقوامی سطح پر بھی کسی ناممکن مشن کو ممکن بنانے کی صلاحیت رکھتے ہیں، دنیابھر میں بلیک اسٹروکس کے نام سے مشہور پاکستان کے ایس ایس جیز کے ساتھ ایشیا سے صرف روس اور اسرائیل کی اسپیشل فورسز ہی خود کو تسلیم کرانے میں کامیاب ہوسکیں، برطانیہ کی ایس اے ایس کو سرفہرست اور امریکا کے نیوی سیلز کو دوسرے درجے میں رکھا گیاہے،لیکن جنگی جنون میں مبتلا اور پاکستان کے روایتی حریف بھارت کا نام دور تک اس میں شامل نہیں۔