کراچی: پاکستان تحریکِ انصاف کی ریلی کی جناح گراوٗنڈ آمد کے موقع پر ایم کیو ایم اور پی ٹی آئی کے کارکنان میں بد نظمی اور تصادم کی فضا پیدا ہوگئی۔
کارکنوں کی جانب سے ایک دوسروں پر ڈنڈوں کا آزادانہ استعمال کیا گیا اور کارکنان ایک دوسرے سے گھتم گھتا دکھائی دیئے۔
عمران خان اور ریحام خان جناح گراؤنڈ میں داخل ہورہے تھے کہ یکایک انہوں نے واپس جانے کا فیصلہ کیا جس کے بعد ان کی گاڑی جناح گراؤنڈ باہر چلی گئی جس سے کارکنان میں افراتفری پھیلی جو ایم کیو ایم کے کارکنان سے تصادم کا سبب بنی۔
پی ٹی آئی کے رہنما فیصل واڈا نے اے آر وائی نیوز سے گفتگو کرتے ہوئے کہا کہ ایم کیوایم والے پہلے ہاتھ ملاتے ہیں اورپھر ڈنڈے برساتے ہیں۔
اس موقع پر ایم کیو ایم کے رہنما خالد مقبول صدیقی نے میڈیا سے گفتگو کرتے ہوئے کہا کہ تحریک انصاف کے رہنماء خوفزدہ ہوکر کارکنان کو بغیر کچھ بتائے نکل گئے جس بد مزگی ہوئی۔ فاروق ستار نےکہا کہ ایم کیوایم پریس کانفرنس کے ذریعے میڈیا اور عوام کو اصل صورتحال سے مطلع کرے گی۔
پولیس کی جانب سے دونوں جماعتوں کے کارکنان کو قابو کرانے کی کوشش کی جارہی ہے۔
تصادم سے پہلے
پی ٹی آئی کی ریلی کی جناح گراوٗنڈ آمد کے موقع پر ایم کیوایم رابطہ کمیٹی نے ریلی کااستقبال کیا، ایم کیوایم کے رہنما فاروق ستار، کنور نوید اور خالد مقبول صدیقی نے عمران خان سے ان کی گاڑی پر جاکر ملاقات کی۔
اس موقع پر پی ٹی آئی کے رہنمااسد عمر نے میڈیا سے گفتگو کرتے ہوئےکہاکہ کراچی پاکستان کا دل ہے اور کراچی کے دل عزیز آباد میں آکر بہت اچھا محسوس کررہے ہیں۔
ریلی کی جناح گراؤنڈ آمد
پاکستان تحریکِ انصاف کے سربراہ عمران خان کی قیادت میں الیکشن ریلی عزیز آباد کے علاقے جناح گراوٗنڈ پہنچ چکی ہے، ایم کیو ایم کی رابطہ کمیٹی نے ریلی کے شرکاء کا استقبال کیا۔
تحریک انصاف کے کارکنوں کی آمد کے موقع پر ایم کیو ایم کے کارکنان نے راستے میں ان پر پھول برسائے اور اپنی پارٹی کے پرچموں کےساتھ ان کی ریلی میں شمولیت اختیار کی۔
اس موقع پر عمران خان کی شریکِ حیات ریحام خان بھی تحریک انصاف کے قائد کے ہمراہ ہیں اور ان کا کہنا ہے کہ جتنا کراچی میں موسم گرم ہے اس زیادہ گرم جوشی سے ان کا استقبال کیا گیا ہے۔
ریلی کا آغاز
پاکستان تحریک انصاف کے سربراہ عمران خان کراچی میں این اے 246 میں منعقد ہونے والے ضمنی انتخابات کی انتخابی مہم کے ضمن میں ریلی کی قیادت کررہے ہیں۔
ریلی کا آغاز سوک سینٹر گلشن ِ اقبال سے ہوا ہے ریلی غریب آباد، کریم آباد اورعزیز آباد کے مختلف راستوں سے ہوتی ہوئی عزیزآباد کے قلب میں واقع جناح گراؤنڈ پہنچے گی جہاں تحریک انصاف کے سربراہ ایم کیوایم کے شہداء کی یادگار پرفاتحہ خوانی کریں گے۔
کارکنان کی جانب سے ریلی کے راستے میں بینرزاور پارٹی پرچم آویزاں کیے گئے ہیں جبکہ عمران خان کے استقبال کے لئے کارکنوں کا جوش وخروش بھی دیدنی ہے۔
ریلی کے انعقاد کے موقع پر حلقے میں سیکیورٹی کے سخت ترین اقدامات اٹھائے گئے ہیں جبکہ جناح گراوٗنڈ میں بھی کسی ممکنہ تصادم کے پیش ِ نظر پولیس کی بھاری نفری موجود ہے جبکہ ریلی کے روٹ پر بھی بھاری نفری تعینات کی گئی ہے۔ ریلی کے راستے کی دوکانیں بھی بند کرادیں گئی ہیں۔ ریلیکے راستے کی فضائی نگرانی بھی کی جارہی ہے۔
این اے 246: ریلی کی تیاری مکمل، قیادت عمران خان کریں گے
اس موقع پر تحریک انصاف کے سربراہ کا کہنا ہے کہ ایم کیوایم کے قائد الطاف حسین کا بیان امن کے لئے خوش آئند ہے۔
عمران خان کی شریکِ حیات ریحام خان بھی اس ریلی میں شرکت کے لئے خصوصی طور پر تشریف لائی ہیں
ایم کیو ایم کے قائد الطاف حسین نے سیاسی کشیدگی کم کرنے کے لئے عمران خان کوجناح گراوٗنڈ میں پیشگی خوش آمدید کہا تھا ساتھ میں ریحام خان کو بھی آنے کی دعوت دی تھی۔
