کراچی : پاکستان تحریک انصاف کے سربراہ عمران خان آج دوپہر کراچی میں این اے 246 میں منعقد ہونے والے ضمنی انتخابات کی انتخابی مہم کے ضمن میں ریلی کی قیادت کریں گے۔
کارکنان کی جانب سے ریلی کی تیاریاں مکمل کی جاچکی ہیں راستے میں بینرز اور پارٹی پرچم آویزاں کیے گئے ہیں جبکہ عمران خان کے استقبال کے لئے کارکنوں کا جوش وخروش بھی دیدنی ہے۔
ریلی کا آغاز سوک سینٹر گلشن ِ اقبال سے ہوگا ، ریلی سہراب گوٹھ ،گلبرگ، کریم آباد اورعزیز آباد کے مختلف راستوں سے ہوتی ہوئی عزیزآباد کے قلب میں واقع جناح گراؤنڈ پہنچے گی جہاں تحریک انصاف کے سربراہ ایم کیوایم کے شہداء کی یادگار پرفاتحہ خوانی کریں گے۔
ریلی کے انعقاد کے موقع پر حلقے میں سیکیورٹی کے سخت ترین اقدامات اٹھائے گئے ہیں جبکہ جناح گراوٗنڈ میں بھی کسی ممکنہ تصادم کے پیش ِ نظر پولیس کی بھاری نفری موجود ہے جبکہ ریلی کے روٹ پر بھی بھاری نفری تعینات کی گئی ہے۔ ریلی کے راستے کی دوکانیں بھی بند کرادیں گئی ہیں۔
اس موقع پر تحریک انصاف کے سربراہ کا کہنا تھا کہ کراچی میں خوف کی فضا ہے جسے ختم کرنے کے لئے یہاں آیا ہوں۔
جناح گراونڈ میں انڈے اور ٹما ٹروں سے استقبال کیلئے تیار ہوں، عمران خان
پاکستان تحریک انصاف کے رہنماؑ جہانگیر ترین کا کہنا تھا کہ این اے 246 کوئی معمولی حلقہ نہیں بلکہ پورے پاکستان میں سب سے اہم حلقہ ہے۔
عمران ِ خان کی شریک حیات ریحام خان بھی انتخابی مہم کے سلسلے میں منعقد ہونے والی ریلی میں شرکت کے لئے کراچی میں موجود ہیں۔
ایم کیو ایم کے قائد الطاف حسین نے سیاسی کشیدگی کم کرنے کے لئے عمران خان کوجناح گراوٗنڈ میں پیشگی خوش آمدید کہا تھا ساتھ میں ریحام خان کو بھی آنے کی دعوت دی تھی۔
