دادو: باراتیوں سے بھری بس پرہائی ٹینشن تارگرنے سے 8 افراد جاں بحق جبکہ متعدد زخمی ہوگئے ہیں۔
تفصیلات کے مطابق اتوار کی صبح فتح پورلنک روڈ پرباراتیوں سے بھری بس پر 11 ہزار وولٹ کی ہائی ٹینشن وائر گرگئی۔
سانحے کے نتیجے میں اب تک کی اطلاعات کے مطابق 8 افراد جھلس کر جاں بحق ہوگئے ہیں جبکہ متعدد زخمی ہیں۔
جاں بحق افراد میں چھ خواتین اور ایک بچہ بھی شامل ہیں ۔ ریسکیو ذرائع کے مطابق نعشوں اورزخمیوں کو دادو کے سول اسپتال منتقل کیا جارہاہے۔
ریسکیو ذرائع نے مزید بتایا کہ تار گرنے سے بس میں آگ لگ گئی جس کے سبب زخمیوں کی تعداد میں اضافہ ہوا۔
اسپتال ذرائع کے مطابق زخمیوں میں سے چند کی حالت تشویشناک ہے اور ہلاک شدگان کی تعداد بڑھنے کا اندیشہ ہے
گورنر سندھ ڈاکٹر عشرت العباد نے سانحے پر افسوس کا اظہار کرتے ہوئے متاثرین کو ہر ممکن طبی امداد فراہم کرنے کا حکم دیاہے۔