لندن: برطانیہ کے عام انتخابات میں کئی نئے چہرے پارلیمان کا حصہ بنیں گے، ان نئے چہروں میں کئی مسلم خواتین کے شامل ہونے کا بھی امکان ہے۔
برطانیہ میں عام انتخابات کا دن آہی گیا، کئی نئے چہرے پارلیمان کا حصہ بنیں گے، ان نئے چہروں مٰیں مسلم خواتین کی بھی شامل ہیں، جو کامیابی کی صورت میں برطانوی پارلیمنٹ کی رکن بن جائیں گی۔
امینہ لون لنکا:
امینہ لون لنکا شائر سے لیبر کی نامزد امیدوار ہیں، ان کا مقابلہ کنزرویٹو کے مضبوط امیدوار ڈیوڈ تھامس مورس سے ہے۔
امینہ لون پچھلے 20 سالوں سے کمیونٹی خدمات کے ساتھ وابستہ ہیں جبکہ سوشل ایکشن ریسرچ فاونڈیشن کی شریک ڈائریکٹر ہیں۔ تینتالیس سالہ امینہ نے برمنگھم میں ایک پاکستانی گھرانے میں آنکھ کھولی، وہ چار بچوں کی والدہ اور سنگل ماں ہیں۔
امینہ مانچسٹر میں رہائش پذیر ہیں، جہاں وہ مقامی کونسلر کی حیثیت سے کام کر چکی ہیں۔
ڈاکٹر روپا حق
ڈاکٹر روپا حق کے مدِ مقابل کنزرویٹیو کی انجی برے ہیں، اس حلقے میں کانٹے کا مقابلہ متوقع ہے۔
چالیس سالہ روپا حق کیمبرج یونیورسٹی سے تعلیم یافتہ ہیں، انھوں نے یونیورسٹی آف ایسٹ لندن سے ڈاکٹریٹ کی ڈگری حاصل کی ہے اور وہ کنزنگٹن یونیورسٹی میں سوشیالوجی کی پروفیسر ہیں جبکہ وہ ایلنگ بارو کی سابقہ نائب مئیر بھی رہ چکی ہیں۔
نصرت غنی
نصرت غنی حکمراں جماعت کنزرویٹو کے ان امیدواروں میں سے ہیں، جن کی جیت کےاچھے امکانات ہیں۔
نصرت غنی ایک عرصے سے ٹوری جماعت کے ساتھ ہیں، وہ اپنے خاندان کی واحد خاتون ہیں جنھوں نے لیڈز یونیورسٹی سے بین الاقوامی تعلقات میں ماسٹر کی ڈگری حاصل کی ہے۔
نصرت غنی برمنگھم سے پچھلے انتخابات میں بھی حصہ لے چکی ہیں جبکہ نشریاتی ادارے بی بی سی کے ساتھ بھی کام کرچکی ہے۔
تسمینہ احمد شیخ
تسمینہ احمد شیخ اسکاٹش نیشل پارٹی کی امیداوار ہیں، ان کے مدمقابل امیدواروں میں لیبر کے مضبوط امیدوار گورڈن بینک اور اسکاٹش کنزرویٹو کے امیدوار لیوک میٹرک گراہم ہیں۔
تسمینہ شیخ 1970ء میں لندن میں پیدا ہوئی اور ایڈنبرا میں پلی بڑھیں ہیں، وہ اسکاٹ لینڈ کی معروف کاروباری خاتون اور وکیل ہیں۔
انھیں شاہی اعزاز ‘او بی ای’ اور ‘وومن آف دا ایئر’ کے اعزاز بھی مل چکے ہیں ، انھیں پاکستان ٹیلی وژن کی معروف اداکارہ کی حیثیت سے بھی شہرت حاصل ہے۔
نتاشہ اصغر
نتاشہ اصغر کنزرویٹیو کی نتاشہ اصغر نیو پورٹ ایسٹ سے امیدوار نامزد کی گئی ہیں، لیبر کی رکن پارلیمنٹ جیسیکا مورڈ انکے مدِ مقابل ہیں، ننتاشہ لندن میں بینک میں ملازم ہیں، اس اس سے پہلے وہ کئی ایشین ٹی وی چینل پر میزبانی کے فرائض انجام دیتی رہی ہیں۔
نتاشہ اصغر 2009ء کی یورپین پارلیمنٹ کی امیدوار بھی رہی ہیں جبکہ ویلش پارلیمانی انتخابات میں دو بار حصہ لیا ہے۔
ان مسلم خواتین امیدواروں کے علاوہ ناز شاہ ،آمنہ احمد ،رضوانہ صدیقی ، عطرت علی سمیت نتاشہ اصغر بھی برطانوی پارلیمانی انتخابات میں مضبوط امیدوار تصور کی جارہی ہیں۔
