لندن : یورپ کے مختلف ملکوں میں سورج آگ برسانے لگا ہے، برطانیہ میں گرمی کا نوسالہ ریکارڈ ٹوٹ گیا جبکہ فرانس میں بھی گرم موسم نے معمولات زندگی متاثرکئے۔
برطانیہ، فرانس ،جرمنی اور دیگر ملکوں میں گرمی نے لوگوں کو بے حال کردیا، برطانیہ میں پارے نے پینتیس ڈگری کو چھوا تو نوسال کا گرمی کا ریکارڈ ٹوٹ گیا۔ گرمی کے توڑ کے لئے لوگوں نے ساحل سمندر اوردیگرٹھنڈے مقامات کا رخ کیا۔
بلجیم ،سوئٹزرلینڈ کے شہر جنیوا اور فرانس کے دارالحکومت پیرس میں درجہ حرارت اڑتیس سینٹی گریڈ تک پہنچ گیا، گرمی کے ستائے لوگوں نے فواروں اورسوئمنگ پولز سے گرمی کوبھگانے کی کوشش کی۔
جرمنی کے شہر میونخ میں درجہ حرارت اکتیس ڈگری سینٹی گریڈ ہوگیا، محکمہ موسمیات کے مطابق رواں موسم گرما تیس برس کے دوران گرم ترین ہونے کی توقع ہے۔
برطانیہ میں پڑنے والی ریکارڈ توڑ گرمی نے چڑیا گھر کے جانوروں کو بھی پریشان کردیا، چڑیا گھر کی انتظامیہ نے جانوروں کو موسم کی شدت سے بچانے کے لئے بھی خاص انتظام کیا ہے، تالاب میں برف کی سلیں ڈال کر جانوروں کو گرمی سے بچانے کا اہتمام کیا گیا ہے۔
