ناروے میں ایک بچے نے ویڈیو گیم کھیلنے کی صلاحیت سے بارہ سنگھے کو دھوکہ دے کر اپنی معصوم بہن کو وحشی جانور سے بچالیا۔
تفصیلات کے مطابق 12 سالہ ہینس جارگن اولسن اور اسکی بہن غلطی سے بارہ سنگھے کے علاقے میں پھنس گئے۔
دونوں بچے اسکول سے گھر آرہے تھے راستے میں جنگل سے گزرتے وقت ایک بارہ سنگھا اس کی چھوٹی بہن کےسامنے آن کھڑا ہوا اور حملے کے لئے پرتولنے لگا۔
ہینس نے صورتحال سے نکلنے کے لئے اپنے ذہن پر زور دیا اور ویڈیو گیم ’ورلڈ آف وار کرافٹ‘ میں سیکھی ایک تکنیک کے مطابق اس نے بارہ سنگھے کی توجہ اپنی جانب مبذول کرالی جس سے اسکی بہن کو بھاگنے کا موقع مل گیا۔
ٹانٹنگ نامی اس تکنیک میں گیمر دشمن کی توجہ دوسرے نہتے کھلاڑیوں سے ہٹا کر اپنی جانب مبذول کراتا ہے۔
جیسے ہی بارہ سنگھا بچے کی جانب متوجہ ہوا وہ بے سدھ ہو کرزمین پر لیٹ گیا بارہ سنگھے نے جب اس میں کوئی حرکت نہیں دیکھی تو اسے چھوڑ کر اپنی راہ چلا گیا اور ہینس نے اٹھ کر گھر کی جانب دوڑ لگادی۔