اسلام آباد: عوامی مسلم لیگ کے سربراہ شیخ رشید نے بنی گالا میں عمران خان سے ملاقات کی،ملک کی سیاسی صورت حال پر تبادلہ خیال سمیت حکومت مخالف ممکنہ احتجاجی تحریک پر تبادلہ خیال کیا گیا۔
دونوں رہنماؤں کے درمیان آج شام عمران خان کی رہائش گاہ بنی گالا میں ملاقات ہوئی، ملاقات کے دوران اسمبلیوں میں واپسی سمیت عدالتی کمیشن کے قیام پر بات چیت ہوئی۔
ذرائع کے مطابق عمران خان نے واضح کیا ہے کہ عدالتی کمیشن کے قیام تک تحریک انصاف قومی اسمبلی واپس نہیں جائے گی، اس موقع پر شیخ رشید نے سینیٹ میں نعمان وزیر کی بطور پارلیمانی لیڈر نامزدگی کو سراہا۔
عمران خان نے حلقہ این اے ایک سو بائیس کے ووٹوں کی نادرا کے ذریعے تصدیق سے متعلق گفتگو کرتے ہوئے امید ظاہر کی کہ نادرا کا نتیجہ مسلم لیگ نواز کی دھاندلی ثابت کر دے گا، بڑے پیمانے پر فراڈ ثابت ہوا تو لاہور احتجاج کا مرکز ہو گا، دونوں رہنماؤں کے درمیان ملاقات پینتالیس منٹ تک جاری رہی۔
