کوئٹہ : نواب اکبر بگٹی قتل کیس میں انسداد دہشتگردی کی خصوصی عدالت نے سابق وزیرِاعظم شوکت عزیز ، سابق گورنر بلوچستان اویس غنی اور سابق ڈی سی اوڈیرہ بگٹی کو مسلسل عدم پیشی کے خلاف سزا دینے کی استدعا پر فیصلہ محفوظ کرلیا ہے۔
نواب اکبر بگٹی قتل کیس کی سماعت انسدادِ دہشتگردی کی خصوصی عدالت کے جج نذیر احمد لانگو نے کی، سابق صدر پرویز مشرف کے وکیل نے میڈیکل رپورٹ پیش کرتے ہوئے عدالت سے درخواست کی کہ ان کا موکل ناسازی طبع کے باعث سفر نہیں کرسکتے، اس لئے انہیں آج کی پیشی سے استثنیٰ دیا جائے۔
فیصلہ میں کہا ہے کہ آئندہ سماعت پر ایک ڈاکٹر کی میڈیکل رپورٹ قابل قبول نہیں ہوگی تاہم عدالت نے سابق صدرکی آج حاضری سے استثنی کی درخواست منظور کرلی ہے۔
عدالت نے سابق صدر پرویز مشرف کی میڈیکل رپورٹ پر عدم اطمینان کا اظہار کرتے ہوئے سات رکنی میڈیکل ٹیم کو رپورٹ پیش کرنے کا حکم دیا، دوران سماعت نواب بگٹی کے صاحبزادے جمیل اکبر بگٹی کے وکیل نے عدالت سے استدعا کی کہ مفرور قرار دئیے گئے سابق وزیراعظم شوکت عزیز ، سابق گورنر بلوچستان اویس احمد غنی اور سابق ڈی سی او ڈیرہ بگٹی کو مسلسل عدم پیشی پر سزا دی جائے
بلوچستان کے سابق وزیر داخلہ شعیب احمد نوشیروانی کے علاوہ سابق صدرپرویز مشرف کے دونوں ضامن بھی عدالت میں پیش ہوئے ، مقدمے کی آئندہ سماعت اب 10نومبر کو ہوگی۔
دوسری جانب ججز کیس میں بھی سابق صدر پرویز مشرف کو حاضری سے استثنی مل گئی۔
