کوئٹہ: انسداد دہشتگردی کی عدالت نے نواب بگٹی قتل کیس میں سابق صدر پرویز مشرف کی حاضری سے ایک دن کی استثنیٰ کی درخواست منظور کرلی ہے۔
مقدمے کی سماعت انسدادِ دہشتگردی کی خصوصی عدالت کے جج آفتاب احمد لون نے کی، سماعت شروع ہوئی تو سابق صدر پرویزِ مشرف کے وکیل نے اپنے مؤکل کی جانب سے حاضری سے ایک دن کی استثنیٰ کی درخواست دائر کرتے ہوئے مؤقف دیا کہ سابق صدر سیکورٹی خدشات اور ڈاکٹروں کی جانب سے سفر نہ کرنے کی ہدایات پر وہ عدالت میں پیش نہیں ہوسکتے۔
جس پر مخالف وکیل نے اعتراض کرتے ہوئے ناسازی طبع کو بہانہ قرار دیا۔
عدالت نے سابق صدر پرویز مشرف کا طبعی معائنہ نہ کرنے پر ڈی جی ہیلتھ بلوچستان کی سرزنش کرتے ہوئے کہا کہ آپ اپنی ذمہ داری ایک دوسرے پر نہ ڈالیں، آئندہ سماعت تک میڈیکل بورڈ کی تشکیل اور طبعی معائنہ کی پیشرفت سے عدالت کو آگاہ کیا جائے۔
جس کے بعد عدالت نے سابق صدر پرویز مشرف کی ایک دن کی استثنیٰ کی درخواست منظور کرتے ہوئے سماعت 25فروری تک کے لئے ملتوی کردی۔
