تازہ ترین

بھارت میں’پریم کہانی‘ کابھیانک انجام

ممبئی : محبت میں مبتلا جوڑے نے لڑکی کے والدین کی جانب سے لڑکے کو رد کئے جانے کے بعد ایک ساتھ خودکشی کا پیمان کیا لیکن معاملات اس وقت خراب ہوئے جب لڑکے نے لڑکی کو قتل کرکے خود کو پولیس کے حوالے کردیا۔

تفصیلات کے مطابق 26 سالہ پرساد ساونت اور 24 سالہ ایکتا گزشتہ11 سال سے ایک دوسرے کو پسند کرتے تھے اور جب ایکتا کے والدین نے پرساد کو داماد کی حیثیت سے قبول کرنے سے انکار کردیا تو دونوں نے مل کر خودکشی کا منصوبہ بنایا

گزشتہ اتوارکو شام 7:15 منٹ پر پرساد اور ایکتا نے کالاچوکی میں اپنی پریم کہانی کی آخری ملاقات کی جہاں پرساد نے چاقو سے ایکتا کا گلا کاٹ دیااور پھر خود کو کالا چوکی پولیس اسٹیشن میں پولیس کے حوالے کردیا۔

ایکتا کو کے ای ایم اسپتال منتقل کیا گیا جہاں ڈاکٹروں نے اسے طبی معائنے کے بعد مردہ قراردے دیا۔ پولیس انسپکٹر سوریا کانت کے مطابق یہ ایک سوچا سمجھا منصوبہ تھا کیونکہ پرساد گزشتہ 15 روز سے اپنے ہمراہ چاقو لئے گھوم رہاتھا۔ پولیس نے پرساد کے خلاف قتل کا مقدمہ درج کرلیا ہے۔

ایکتا کے والدین اس خبر سے صدمے میں آگئے ہیں اس کے والد نے اس بات کی تصدیق کی کہ انہوں نے رشتے کی مخالفت کی تھی کیونکہ انہیں پرساد کبھی پسند نہیں تھا۔

Comments

- Advertisement -