کراچی :تحریکِ انصاف آج کراچی میں پلان سی پر عمل درآمد کیلئے تیار ہے، دھاندلی کیخلاف تحریک انصاف پلان سی کے تحت کراچی میں اٹھائیس مقامات پر احتجاجی دھرنا دے رہی ہے۔، پی ٹی آئی سندھ کے صدر نادر اکمل لغاری کا کہنا ہے کہ آج پورا کراچی بند ہوگا۔
پی ٹی آئی کے رہنماء عارف علوی کا کہنا ہے کہ سڑکوں پرگاڑیاں نہیں آنے دیں گے۔
تحریکِ انصاف آج کراچی میں اپنی قوت کا مظاہرہ کرنے جا رہی ہے، پی ٹی ذرائع کے مطابق عارف علوی ،اسد عمر ،نجیب ہارون ، حفیظ الدین ،عمران اسماعیل ،اعظم سواتی ، علی زیدی ،فردوس نقوی ، ناز بلوچ اور سبحان ساحل دھرنے کی قیادت کریں گے۔
پی ٹی آئی کے شہر کے اٹھائیس مقامات پراحتجاجی دھرنے جاری ہیں، کلفٹن تین تلوار پر پی ٹی آئی کے کارکنوں نے رات سے ہی دھرنا دیا ہوا ہے، صبح سات بجے شہر کی مختلف شاہراہوں کو بھی پی ٹی آئی کے کارکنوں نے دھرنا دے کربلاک کردیا ہے، جن میں نیشنل ہائی وے، حسن اسکوائر، شاہراہ فیصل نرسری، سپر ہائی وے ، فائیو اسٹار چورنگی اور نارتھ ناظم آباد شامل ہیں ،کارکنوں نے کئی علاقوں میں ٹائر جلا کر سڑکیں بند کردی، جس کی وجہ سے صبح دفاتر جانے والے افراد اور اسکول جانے والے بچوں کو پریشانی کا سامنا کرنا پڑا، شارع فیصل کا ایک ٹریک بھی بند ہے۔
پاکستان تحریکِ انصاف کی جانب سے دھرنوں کی اپیل پر حکومت سندھ کی جانب سے کراچی میں سیکیورٹی کے سخت انتظامات کئے گئے ہیں، شاہراہ فیصل نرسری کے مقام پر پی ٹی آئی کے احتجاج کے موقع پر پیٹرول پمپ اور دکانیں بند ہیں اور ٹریفک بھی معمول سے کم ہے جبکہ بیرون شہر سے آنے والی ٹریفک بھی معطل ہے۔
پاور ہاوس چو رنگی، شاہراہ فیصل، حسن اسکوائر، نیٹی جیٹی، تین تلوار، قیوم آباد، ملیر کے مقامات پرکارکن شاہراہوں پر بیٹھے ہیں، شارع فیصل پر پی ٹی آئی کارکنان نے احتجاج کے دوران ٹائر جلا کر سڑک بلاک کرنے کی کوشش کی، پولیس نے مظاہرین کو منتشر کرنے کیلئے لاٹھی چارج کیا، جس کے بعد ریپڈرسپانس فورس نے شارع فیصل کو ٹریفک کےلئے بحال کرادیا، نیٹی جیٹی کے پل سمیت کئی شاہراہوں سے کارکنوں کو ہٹانے کے لئے پولیس کے انتظامیہ کے ساتھ مذاکرات جاری ہیں۔
