تکریت:عراقی وزیر اعظم حیدر العبادی نے اعلان کیا ہے کہ عراقی فورسز اورشیعہ جنگجو گروہوں نے وسطی تکریت کو داعش کے قبضے سے چھڑا لیا ہے۔
تفصیلات کے مطابق تاحال سابق ڈکٹیٹر صدام حسین کے آبائی شہر کو مکمل طور پرداعش کے قبضے سے واگزار نہیں کرایا جاسکا لیکن شہر کے کے اہم حصے واپس عراقی حکومت کے زیرِاثر آچکے ہیں۔
ایک ماہ سے حکومتی اتحاد اس اہم شہر کے لئے داعش کے خلاف مصروفِ پیکار تھا جو کہ داعش کا مضبوط ترین قلعہ بن چکا تھا، اس معرکے میں امریکہ کی جانب سے کیے گئے فضائی حملوں نے اہم کردار ادا کیا ہے۔
تاحال شہر کے کم سے کم تین علاقے داعش کے زیرِ اثر ہیں اورسینکڑوں شدت پسند باغی وہاں موجود ہیں۔
شہر کو مکمل طور پرداعش کے قبضےسے آزاد کرنے کے لئےعراقی افواج کی مزید تعداد شہر میں داخل کی گئی ہے حالانکہ ابھی گوریلا طرز کے حملوں کا خطرہ موجود ہے۔
عراقی وزیراعظم کا اپنے بیان میں کہنا تھا کہ عراقی افواج شہر کے وسطی علاقے میں اپنا تسلط جمانے میں کامیاب ہوچکی ہیں اور اب وہ مشرقی اور مغربی علاقوں پر قبضہ حاصل کرنے کی پیش بندی کررہی ہیں۔
تکریت کی جنوبی سمت میں کی جانے والی حالیہ پیش قدمی میں گورنر ہیڈ کوارٹر اور شہر کا مرکزی اسپتال داعش کے قبضے سے آزاد کرائے جاچکے ہیں۔
